ന്യൂഡൽഹി: ഇന്ത്യയുമായുള്ള ക്വാഡ് സഖ്യത്തിലെ പങ്കാളിത്തം നിർണ്ണായകമെന്നും അഫ്ഗാനും ചൈനയും ക്വാഡ് സഖ്യത്തിന്റെ റഡാറിലെന്ന് ഓസ്ട്രേലിയൻ വിദേശകാര്യമന്ത്രി മാരിസ് പെയിൻ. ഭീകരരുടെ കേന്ദ്രമായി മാറിയിരിക്കുന്ന അഫ്ഗാനിലെ താലിബാനെ കേന്ദ്രീകരിക്കാതിരിക്കാൻ നിർവ്വാഹമില്ലെന്നും മാരിസ് പെയിൻ പറഞ്ഞു.
ഇന്ത്യയും ഓസ്ട്രേലിയയും ക്വാഡ് സഖ്യത്തിന്റെ ഭാഗമെന്ന നിലയിൽ ഏഷ്യൻ മേഖലയിൽ വഹിക്കാനുള്ളത് നിർണ്ണായക സ്ഥാനമാണ്. അഫ്ഗാനിലെ സംഭവവികാസങ്ങൾ മേഖലയിൽ കൂടുതൽ ശ്രദ്ധകേന്ദ്രീകരിക്കേണ്ട ആവശ്യകതയാണ് സൂചിപ്പിക്കുന്നത്. അതേസമയം പസഫിക്കിൽ ചൈന ഉയർത്തുന്ന വെല്ലുവിളികളും പ്രതിരോധ രംഗത്തെ ഗൗരവമേറിയ വിഷയമാണെന്നും മാരിസ് പെയിൻ പറഞ്ഞു.
ഓസ്ട്രേലിയ ഇന്ത്യയുമായി നിരവധി മേഖലകളിലെ സഹകരണം ശക്തമാക്കുകയാണ്. ജനാധിപത്യരാജ്യങ്ങളെന്ന നിലയിൽ വിദ്യാഭ്യാസവും വ്യാപാരവും ആരോഗ്യരംഗവും സുപ്രധാന സഹകരണ മേഖലകളാണ്. അതേസമയം ശാസ്ത്രസാങ്കേതിക രംഗത്തെ വിഷയങ്ങളെന്ന നിലയിൽ സൈബർ സുരക്ഷ, കാലാവസ്ഥാ വ്യതിയാനം എന്നിവയും പ്രമുഖ വിഷയങ്ങളാണെന്നും പെയിൻ ചൂണ്ടിക്കാട്ടി.
