ന്യൂഡൽഹി: ലോകം മുഴുവൻ ചർച്ചയായ അഫ്ഗാനിസ്താനിലെ ആഭ്യന്തര പ്രതിസന്ധി പ്രമേയമാകുന്ന ചിത്രം ബോളിവുഡിൽ ഒരുങ്ങുന്നു. ഗരുഡ് എന്നാണ് ചിത്രത്തിന് പേരിട്ടിരിക്കുന്നത്. ഇപ്പോൾ ചിത്രത്തിന്റെ മോഷൻ പോസ്റ്റർ പുറത്തുവിട്ടാണ് അണിയറ പ്രവർത്തകർ വിവരം പുറത്തുവിട്ടത്.
അഫ്ഗാനിൽ നടന്ന യാഥാർത്ഥ സംഭവങ്ങളെ അടിസ്ഥാനമാക്കി ചിത്രീകരിക്കുന്ന സിനിമയിൽ ഇന്ത്യൻ വ്യോമസേനയുടെ പ്രത്യേക സേന യൂണിറ്റായ ഗരുഡ് കമാൻഡോ ഫോഴ്സിലെ ഒരു ഉദ്യോഗസ്ഥന്റെ കഥയാണ് പറയുന്നത്.
അഫ്ഗാനിലെ രക്ഷാദൗത്യ പ്രവർത്തനങ്ങളാണ് ചിത്രത്തിൽ പ്രധാനമായും ആവിഷ്കരിക്കുന്നതെന്നും 2022 ഓഗസ്റ്റ് 15ന് ഗരുഡ് റിലീസ് ചെയ്യാനാണ് തീരുമാനിച്ചിട്ടുള്ളതെന്നും അണിയറ പ്രവർത്തകർ അറിയിച്ചു.
അജയ് കപൂറും സുഭാഷ് കാലെയും ചേർന്ന് നിർമിക്കുന്ന ചിത്രത്തിന്റെ സംവിധാനവും പ്രധാന അഭിനേതാക്കളും ആരാണെന്ന് വെളിപ്പെടുത്തിയിട്ടില്ല. കെജിഎഫിന്റെ സംഗീത സംവിധായകൻ രവി ബാസ്രുറാണ് ഗരുഡിന് പശ്ചാത്തല സംഗീതമൊരുക്കുന്നത്. തിരക്കഥയും സംഭാഷണവും നിധി സിംഗ് ധർമ നിർവഹിക്കും.
