തിരുവനന്തപുരം: സംസ്ഥാനത്ത് രണ്ട് വയസിൽ താഴെയുള്ള കുട്ടികൾക്ക് ഒരു പ്രതിരോധ വാക്സിൻ കൂടി. ന്യൂമോകോക്കൽ കോൺജുഗേറ്റ് (പി.സി) എന്ന വാക്സിനാണ് മറ്റ് സംസ്ഥാനങ്ങൾക്കൊപ്പം കേരളത്തിലും നൽകുന്നത്. ന്യുമോണിയക്ക് എതിരായ പ്രതിരോധ കുത്തിവെയ്പ്പാണിത്.
ഒന്നരമാസത്തിലും മൂന്നരമാസത്തിലും ഒരോ ഡോസ് വീതവും ഒരു വയസിന് ശേഷം ബൂസ്റ്റർ ഡോസുമാണ് പി.സി വാക്സിൻ നടപ്പിലാക്കിയ സംസ്ഥാനങ്ങളിൽ കുട്ടികൾക്ക് വിതരണം ചെയ്യുന്നത്. അതേസമയം കേരളത്തിൽ വാക്സിൻ വിതരണം എപ്രകാരമാകണമെന്ന കാര്യത്തിൽ തീരുമാനമായിട്ടില്ല.
പലപ്പോഴും ന്യുമോണിയ ഗുരുതരമാകാനുള്ള കാരണം ന്യൂമോ കോക്കൽ ബാക്ടീരിയയാണ്. പുതിയ വാക്സിന് ന്യുമോണിയയും അതുമായി ബന്ധമുള്ള മറ്റ് രോഗങ്ങളും തടയാനാകും. രക്തത്തിലും ചെവിയിലുമുണ്ടാകുന്ന അണുബാധയ്ക്കും മെനിഞ്ചൈറ്റിസിനും ന്യൂമോ കോക്കൽ ബാക്ടീരിയ കാരണമാകുന്നുണ്ടെന്നാണ് പഠനങ്ങൾ തെളിയിക്കുന്നത്.
കുട്ടികൾക്ക് നിലവിൽ നൽകി കൊണ്ടിരിക്കുന്ന പെന്റാവലന്റ് വാക്സിനിൽ ഹിബ് വാക്സിൻ ഉൾപ്പെടുത്തിയിട്ടുണ്ട്. ഇത് ബാക്ടീരിയ കാരണമുണ്ടാകുന്ന ന്യുമോണിയക്ക് ഫലപ്രദമാണ്. ഇനിമുതൽ ഹിബ് വാക്സിനോടൊപ്പമാണ് പി.സി വാക്സിൻ കൂടി നൽകുന്നത്. ഇതോടെ ന്യുമോണിയയെ ചെറുക്കാനുള്ള പ്രതിരോധം കുട്ടികൾക്ക് കൂടുമെന്നാണ് വിലയിരുത്തൽ.
