ബീജിംഗ്: 2022ൽ നടക്കാനിരിക്കുന്ന ബീജിംഗ് ശീതകാല ഒളിമ്പിക്, പാരാലിമ്പിക് മത്സരങ്ങളുടെ മുദ്രാവാക്യം ഔദ്യോഗികമായി പ്രകാശനം ചെയ്തു. എല്ലാവരുടെയും ഭാവിക്കായി ഒന്നിച്ചു പ്രവർത്തിക്കാം എന്നതാണ് മുദ്രാവാക്യം. നഗരത്തിലെ ക്യാപിറ്റൽ മ്യൂസിയത്തിൽ വെച്ചായിരുന്നു പ്രകാശനം.
മനുഷ്യരാശിയുടെ നല്ലൊരു ഭാവിക്കായി എല്ലാവരും ഒറ്റക്കെട്ടായി പ്രവർത്തിക്കേണ്ടതിന്റെ ആവശ്യകത വിളിച്ചോതുന്നതാണ് മുദ്രാവാക്യത്തിന്റെ ആശയം. മത്സരങ്ങൾ ചെറുതോ വലുതോ ആവട്ടെ, ജാതി, മത, നിറ വ്യത്യാസമില്ലാതെ എല്ലാവരുടെയും കൂട്ടായ പരിശ്രമത്തിലൂടെ മാത്രമെ ഒരു രാജ്യത്തിന് വിജയം കൈവരിക്കാനാവു.
മത്സരങ്ങളിൽ മാത്രമല്ല, കൊറോണ മഹാമാരിയിൽ ലോകം പകച്ചു പോയപ്പോഴും എല്ലാ രാജ്യങ്ങളുടെയും കൂട്ടായ പരിശ്രമത്തിലൂടെയും, സഹകരണത്തിലൂടെയുമാണ് ഒരു പരിധി വരെ കൊറോണയെ പ്രതിരോധിക്കാൻ സാധിച്ചതെന്ന് ഒളിമ്പിക് ഓർഗനൈസിംഗ് കമ്മറ്റി വ്യക്തമാക്കി.
ഒരു ലോകം, ഒരു സ്വപ്നം എന്ന 2008 ബീജിംഗ് ഒളിമ്പിക്സിന്റെ മുദ്രാവാക്യത്തിൽ നിന്നും പ്രചോദനം ഉൾക്കൊണ്ടാണ് 2022ൽ ഇത്തരത്തിൽ ഒരു മുദ്രാവാക്യം തയ്യാറാക്കിയതെന്ന് ബീജിംഗ് 2022 കൾച്ചർ ആൻഡ് സെറിമണീസ് ഡിപ്പാർട്ട്മെന്റ് ഡയറക്ടർ ജനറൽ ചെൻ നിങ് പറഞ്ഞു.
2022 ഫെബ്രുവരി 4 മുതൽ 20 വരെയാണ് ശീതകാല ഒളിമ്പിക്സ് സംഘടിപ്പിക്കുന്നത്. പാരലിമ്പിക്സ് 2022 മാർച്ച് 4 മുതൽ 20 വരെയായിരിക്കും. മത്സര വേദികളുടെ ഒരുക്കങ്ങളെല്ലാം പൂർത്തിയായതായി സംഘാടകർ അറിയിച്ചു.
Comments