മുംബൈ: ഇന്ത്യൻ നിരത്തുകൾ കീഴടക്കാൻ ഒരുങ്ങുകയാണ് ഓഡി. ഇന്ത്യയിലെ ഇലക്ട്രിക് വാഹന ശ്രേണിയിലേയ്ക്ക് ഓഡി ഇ-ട്രോൺ ജിറ്റി, ആർഎസ് ജിറ്റി എന്നീ കാറുകൾ അവതരിപ്പിച്ചിരിക്കുകയാണ് നിർമ്മാതാക്കൾ. ഇ-ട്രോൺ ജിറ്റിയ്ക്ക് 1,79,90,000 രൂപയും, ആർഎസ് ജിറ്റിയ്ക്ക് 2,04,99,000 രൂപയുമാണ് എക്സ് ഷോറൂം വില. കമ്പനി നിർമ്മിച്ചതിൽ ഏറ്റവും കരുത്തുറ്റ വാഹനമാണ് ഇ-ട്രോൺ ജിറ്റി.
ഇലക്ട്രിക് വാഹന രംഗത്ത് ഓഡി ഇന്ത്യയുടെ ചുവടുവെയ്പ്പ് വളരെ വൈകിയായിരുന്നു. ജൂലൈയിലാണ് ഇ-ട്രോൺ, ഇ-ട്രോൺ സ്പോർട്ട്ബാക്ക് എന്നീ ഇലക്ട്രിക് വാഹനങ്ങൾ ഓഡി ഇന്ത്യൻ നിരത്തുകളിൽ എത്തിക്കുന്നത്. എന്നാൽ മറ്റു വാഹന നിർമ്മാതാക്കൾ ഇലക്ട്രിക് വാഹനങ്ങൾ ഇതിനോടകം തന്നെ ഇന്ത്യയിൽ അവതരിപ്പിച്ചിരുന്നു. ഈ രംഗത്തെ തുടക്കം വൈകിയെങ്കിലും ഇന്ന് കരുത്തുറ്റ രണ്ട് വാഹനങ്ങൾ അവതരിപ്പിച്ചിരിക്കുകയാണ് ഓഡി.
ഫെബ്രുവരിയിലാണ് ഓഡി ഇ-ട്രോൺ ജിറ്റി ലോകത്ത് അവതരിപ്പിച്ചത്. വൻ ജനശ്രദ്ധ നേടിയ വാഹനം ടെസ്ല മൊഡൽ എസ് പ്ലെയ്ഡിനും പോർഷെ ടെയ്ക്കാനും എതിരാളിയാണെന്ന് വാഹന പ്രേമികൾ ഉറച്ചു വിശ്വസിച്ചു. അവരുടെ വിശ്വാസങ്ങൾക്ക് വിള്ളൽ ഏൽപ്പിക്കാതെയാണ് ഓഡി രണ്ട് ഇലക്ട്രിക് വാഹനങ്ങൾ ഇന്ത്യയിൽ അവതരിപ്പിച്ചത്.
470 എച്ച്പി കരുത്തും 630 എൻഎം ടോർക്കും ഉത്പാദിപ്പിക്കുന്ന മോട്ടറാണ് ഇ-ട്രോൺ ജിറ്റിയ്ക്ക് നൽകിയിരിക്കുന്നത്. കൂടാതെ ഓവർബൂസ്റ്റ് മോഡിൽ 522 എച്ച്പി കരുത്തും 10 എൻഎം ടോർക്കും അധികമായി മോട്ടർ ഉത്പാദിപ്പിക്കുന്നു. 4.1 സെക്കൻഡിനുള്ളിൽ 100 കിലോമീറ്റർ വേഗത കൈവരിക്കാൻ ഈ വാഹനത്തിന് സാധിക്കും.
590 എച്ച്പി കരുത്തും 830 എൻഎം ടോർക്കും ഉത്പാദിപ്പിക്കുന്ന മോട്ടറാണ് ആർഎസ് ഇ-ട്രോൺ ജിറ്റിയ്ക്കുള്ളത്. 637 എച്ച്പി അധിക കരുത്തും ഉത്പാദിപ്പിക്കാൻ വാഹനത്തിന് സാധിക്കും. വെറും 3.3 സെക്കൻഡിനുള്ളിൽ 100 കിലോമീറ്റർ വേഗതയിലെത്താൻ ഈ വാഹനത്തിന് കഴിയും.
രണ്ട് വാഹനങ്ങൾക്കും സംയോജിതമായ 10.1 ഇഞ്ച് ടച്ച് സ്ക്രീനും, 12.3 ഇഞ്ച് ഓഡി വെർച്വൽ കോക്പിറ്റ് ഡിജിറ്റൽ ഇൻസ്ട്രമെന്റ് ക്ലസ്റ്ററും ലഭിക്കുന്നു. അടുത്തുള്ള ചാർജിഗ് സ്റ്റേഷന് കണ്ടെത്തുവാൻ ഉൾപ്പെടെ സഹായിക്കുന്ന നാവിഗേഷൻ സംവിധാനവും വാഹനങ്ങളിൽ സജ്ജമാക്കിയിട്ടുണ്ട്.
