ലോകത്തിലെ ഏറ്റവും വേഗതയേറിയ കാർ ഏതാണ്? നിങ്ങളൊരു വാഹനപ്രേമി അല്ലെങ്കിൽ ഉത്തരം ലംബോർഗിനി എന്നോ ഫെറാറി എന്നോ ആയിരിക്കാം. വാഹന കമ്പം ഉള്ള കൂട്ടത്തിൽ ആണെങ്കിൽ ബുഗാട്ടി എന്നോ കോണിഗ്‌സെഗ്ഗ് എന്നോ ആയിരിക്കും ഉത്തരം. എന്നാൽ ലോകത്തിലെ ഏറ്റവും വേഗതയേറിയ കാർ ഇവയൊന്നുമല്ല. അമേരിക്കൻ സൂപ്പർ കാർ നിർമ്മാതാക്കളായ എസ് എസ് സി യുടെ റ്റുവാറ്റാരയാണ് ലോകത്തിലെ ഏറ്റവും വേഗതയേറിയ കാർ. ബുള്ളറ്റ് ട്രെയിനിനേക്കാൾ വേഗത്തിൽ കുതിക്കുന്ന റ്റുവാറ്റാരയുടെ പ്രത്യേകതകൾ നിരവധിയാണ്.
മറ്റുള്ള സൂപ്പർകാർ ബ്രാൻഡുകളെപോലെ ലോകത്തിന്റെ വിവിധ ഭാഗങ്ങളിൽ വാഹനം വിൽക്കുന്നവർ അല്ല എസ് എസ് സി. അമേരിക്ക തന്നെയാണ് പ്രധാന വിപണി. അതുകൊണ്ട് തന്നെയാവും ഈ ഒരു പേര് സുപരിചിതമല്ലാത്തത്. മണിക്കൂറിൽ 508 കിലോമീറ്റർ എന്ന മാന്ത്രിക വേഗം വരെ എസ് എസ് സി റ്റുവാറ്റാര എത്തിപ്പിടിച്ചിട്ടുണ്ട്. ജപ്പാനിൽ ഓടുന്ന ചില ബുള്ളറ്റ് ട്രെയിനുകൾക്കുപോലും ഇതിനേക്കാൾ വേഗത കുറവാണ്.
കോണിഗ്‌സെഗ്ഗിന്റെ അഗെര ആർഎസ് സ്ഥാപിച്ച മണിക്കൂറിൽ 457.94 കിലോമീറ്റർ എന്ന റെക്കോഡ് ആണ് എസ് എസ് സി റ്റുവാറ്റാര തകർത്തത്. ലാസ് വെഗാസ് നെവാഡയിലെ പഹ്റുമ്പ് എന്ന സ്ഥലത്തെ 11.2 കിലോമീറ്റർ നെടുനീളൻ റോഡിലൂടെയാണ് എസ്എസ്സി റ്റുവാറ്റാര തലങ്ങും വിലങ്ങും പാഞ്ഞ് മണിക്കൂറിൽ 508 കിലോമീറ്റർ വേഗ റെക്കോർഡ് സ്ഥാപിച്ചത്. ആദ്യ ശ്രമത്തിൽ മണിക്കൂറിൽ 484.53 കിലോമിറ്ററും രണ്ടാം ശ്രമത്തിൽ മണിക്കൂറിൽ 532.93 കിലോമിറ്റർ വേഗവുമാണ് കൈവരിച്ചത്. ഇതിന്റെ ശരാശരിയാണ് മണിക്കൂറിൽ 508 കിലോമീറ്റർ വേഗം.
എന്നാൽ ഇതെങ്ങനെ ശരിയാകും? ലോകത്തിലെ ഏറ്റവും വേഗതയുള്ള കാർ മണിക്കൂറിൽ 490 കിലോമീറ്റർ പാഞ്ഞ ബുഗാട്ടി ഷിറോൺ അല്ലെ എന്ന് ചിലരിപ്പോൾ ചിന്തിക്കുന്നുണ്ടാവും. ഇത് പക്ഷെ ഇതുവരെ റെക്കോർഡ് ആയി അംഗീകരിച്ചിട്ടില്ല. ഒരേ ട്രാക്കിൽ ഇരു ഭാഗത്തേക്കും ഡ്രൈവ് ചെയ്ത് രണ്ട് പ്രാവശ്യത്തെയും ശരാശരി വേഗമാണ് റെക്കോർഡ് ആയി അംഗീകരിക്കുക. ബുഗാട്ടി ഷിറോൺ മണിക്കൂറിൽ 490 കിലോമീറ്റർ വേഗം ഇത്തരത്തിൽ തെളിയിച്ചിട്ടില്ല. ബുഗാട്ടിയുടെ സ്വന്തം ടെസ്റ്റ് ട്രാക്കിൽ ആയിരുന്നതുകൊണ്ട് ഇത് റെക്കോർഡ് ആയി അംഗീകരിച്ചിട്ടില്ല.
1,350 എച്ച്പി പവർ നിർമ്മിക്കുന്ന 5.9 ലിറ്റർ വി8 എൻജിൻ ആണ് റ്റുവാറ്റാരയുടെ ഹൃദയം. 1,735 എൻഎം ടോർക്കും ഉത്പാദിപ്പിക്കുന്ന ഈ എൻജിൻ 7-സ്പീഡ് ഓട്ടോമാറ്റിക് ഗിയർബോക്സുമായാണ് ബന്ധിപ്പിച്ചിരിക്കുന്നത്. 12 കോടി ഇന്ത്യൻ രൂപയ്‌ക്ക് തുല്യമായ അമേരിക്കൻ ഡോളർ ചിലവാക്കണം റ്റുവാറ്റാരയെ സ്വന്തമാക്കണമെങ്കിൽ.
