മുംബൈ: രഹസ്യമായി ഗർബ ആഘോഷം നടത്തിയ സംഘാടകരും പങ്കെടുത്തവരും പോലീസ് പിടിയിൽ. മുംബൈയിലെ ഭയാന്ദർ വെസ്റ്റിലാണ് സംഭവം. കൊറോണ പ്രതിസന്ധിയെ തുടർന്ന് നവരാത്രിക്കാലങ്ങളിൽ നടത്തി വരാറുള്ള ഗർബ ആഘോഷങ്ങൾക്ക് ഈ വർഷം സർക്കാർ അനുമതി നൽകിയിരുന്നില്ല. നിയമം ലംഘിച്ച് പാർട്ടി നടത്തിയതിനാലാണ് അറസ്റ്റ്.
350 മുതൽ 400 പേരെ ഉൾക്കൊള്ളിച്ചായിരുന്നു രഹസ്യമായി പാർട്ടി നടത്തിയത്. ഇതിനായി വാട്ട്സാപ്പ് വഴി പാർട്ടിയുടെ വിശദാംശങ്ങൾ കൈമാറി. തുടർന്ന് കൊറോണ നിയമങ്ങൾ കാറ്റിൽ പറത്തി ആളുകൾ ഭയാന്ദർ വെസ്റ്റിലുള്ള ബാങ്ക്വറ്റ് ഹാളിൽ ഒത്തുകൂടുകയായിരുന്നു.
പാർട്ടിയെ കുറിച്ച് വിവരം ലഭിച്ച പോലീസ് സ്ഥലത്തെത്തി പരിപാടിയുടെ സംഘാടകരെയും ഹാൾ ഉടമയെയും അറസ്റ്റ് ചെയ്തു. സീനിയർ ഇൻസ്പെക്ടർ മുകുട്റാവു പാട്ടീലിന്റെ നേതൃത്വത്തിലായിരുന്നു അറസ്റ്റ്. ഹാൾ ഉടമ യാഷ് രഞ്ജിത് ചജാദ്, ഗർഭ പാർട്ടിയുടെ സംഘാടകൻ ഹസ്മുഖ് തൻജി പരിഹാർ എന്നിവരാണ് പിടിയിലായത്.
അനുമതിയില്ലാതെ വിവാഹം നടത്തിയതിന്റെ പേരിൽ ബാങ്ക്വറ്റ് ഹാളിനെതിരേ ഇതിനു മുൻപും കേസ് രജിസ്റ്റർ ചെയ്തിട്ടുണ്ടെന്ന് പോലീസ് പറഞ്ഞു.
