ന്യൂഡൽഹി: കലണ്ടറിൽ ഡിസ്‌നി ഇന്ത്യ എന്ന് രേഖപ്പെടുത്താൻ തയ്യാറായിക്കോളു. 2021 മുതൽ 2022 വരെയുള്ള സിനിമകളുടെ റിലീസ് തീയതി പ്രഖ്യാപിച്ച് ഡിസ്‌നി ഇന്ത്യ.
മാർവൽ സ്റ്റുഡിയോ അണിയിച്ചൊരുക്കുന്ന എറ്റേർണൽസിലൂടെ ഡിസ്‌നി ഇന്ത്യയുടെ സിനിമാ റിലീസുകൾക്ക് തിരിതെളിയുകയാണ്. 2021 നവംബർ 5നാണ് എറ്റേർണൽസ് പുറത്തിറങ്ങുന്നത്. ദീപാവലിയോടനുബന്ധിച്ചാണ് എറ്റേർണൽസ് പുറത്തിറങ്ങുന്നത്. ഇംഗ്ലീഷ്, ഹിന്ദി, തമിഴ്, തെലുങ്ക്, കന്നഡ, മലയാളം എന്നീ ഭാഷകളിലാണ് സിനിമ പ്രേക്ഷകരിലേയ്‌ക്ക് എത്തുന്നത്.
26-ാമത് മാർവൽ സിനിമയായ എറ്റേർണൽസിൽ ഒരു പുതിയ സൂപ്പർ ഹീറോയാണ് മാർവൽ ടീമിലേക്ക് എത്തുന്നത്. ഓസ്‌കാർ ജേതാവായ ക്ലോ ജാവോയാണ് സിനിമയുടെ സംവിധായകൻ. 7000 വർഷങ്ങളായി ഭൂമിയുടെ നിഗൂഡതകളിൽ ജീവിച്ചിരിക്കുന്ന അമാനുഷിക ശക്തിയുള്ള ഹീറോയുടെ കഥയാണ് എറ്റേർണൽസ്.
2022 മുതൽ ഡിസ്‌നി ഇന്ത്യ സിനിമകളുടെ ഒരു നീണ്ട നിര തന്നെ ആരാധകരെ കാത്തിരിക്കുന്നു. 2022 മാർച്ച് 25നാണ് ഡോക്ടർ സ്‌ട്രേഞ്ച്: മൾട്ടിവെഴ്‌സ് ഓഫ് മാഡ്‌നസിന്റെ റിലീസ്. മെയ് 6ന് തോർ: ലൗ ആൻഡ് തണ്ടറും, ജൂൺ 17ന് ലൈറ്റിയറും, ജൂലൈ 8ന് ബ്ലാക്ക് പാന്തർ: വക്കാണ്ട ഫോറെവറും ഒക്ടോബർ 7ന് ബ്ലേയ്ഡും നവംബർ 11ന് ദി മാർവൽസും, കലാശക്കൊട്ടായി ഡിസംബർ 16ന് അവതാർ 2-വും പുറത്തിറങ്ങും.
ലോകമെമ്പാടും ഉള്ള സിനിമാ ആസ്വാദകരെ ആവേശം കൊള്ളിക്കുന്നതാണ് ഡിസ്‌നിയുടെ സിനിമകൾ. ഇന്ത്യയിലും ഈ സിനിമകൾക്ക് ആരാധകർ ഏറെയാണ്.
