റോജിൻ തോമസ് സംവിധാനം ചെയ്ത മലയാള ചിത്രം ഹോം പ്രേക്ഷകർക്കിടയിൽ ഏറെ നിരൂപക പ്രശംസ ഏറ്റുവാങ്ങിയിരുന്നു. ചിത്രത്തിൽ ഇന്ദ്രൻസിന്റേയും മഞ്ജു പിള്ളയുടേയും അഭിനയത്തെ അഭിനന്ദിച്ച് നിരവധി പേരാണ് എത്തിയത്. ഇപ്പോഴിതാ ചിത്രത്തെ ഹിന്ദിയിലേക്ക് റിമേക്ക് ചെയ്യുകയാണെന്ന് അറിയിച്ചിരിക്കുകയാണ് നിർമ്മാതാവ് വിജയ് ബാബു.
വിജയ് ബാബു നിർമ്മിച്ച അങ്കമാലി ഡയറീസ് റീമേക്ക് ചെയ്ത അബർടൻഷ്യ എന്റർടെയ്ൻമെന്റ് തന്നെയാണ് ഹോമും റീമേക്ക് ചെയ്യുന്നത്. 21 വർഷങ്ങൾക്ക് മുമ്പ് മുംബൈയിൽ തന്റെ കരിയർ തുടങ്ങുമ്പോൾ മുംബൈ ടൈംസിന്റെ ഫ്രണ്ട് പേജിൽ എന്നെ കുറിച്ച് ഫീച്ചർ വരുന്നത് സ്വപ്നം കണ്ടിരുന്നു. ഒപ്പം ബോളിവുഡ് സിനിമയുടെ ഭാഗമാകണമെന്ന ആഗ്രഹവും ഉണ്ടായിരുന്നു. ഹോം ആ സ്വപ്നങ്ങൾ യാഥാർത്ഥ്യമാക്കുകയാണെന്നാണ് വിവരം പങ്കുവെച്ച് വിജയ് ബാബു കുറിച്ചത്.
വിദ്യാ ബാലൻ നായികയായെത്തിയ ഷെർണി, ശകുന്തള ദേവി, എയർലിഫ്റ്റ്, ടോയ്ലറ്റ് ഏക് പ്രേം കഥ, ഷെഫ്, നൂർ തുടങ്ങിയ ചിത്രങ്ങൾ നിർമ്മിച്ചത് അബർടൻഷ്യ എന്റർടെയ്ൻമെന്റ് ആണ്. ഹോം എന്ന വളരെ മനോഹരമായ സിനിമ റീമേക്ക് ചെയ്യാൻ അവസരം ലഭിച്ചതിൽ അതിയായ സന്തോഷമുണ്ടെന്ന് അബൻടൻഷ്യ എന്റർടെയിൻമെന്റ് സിഇഓ വിക്രം മൽഹോത്ര പറഞ്ഞു.
