മുംബൈ: ലോകത്തിലെ ഏറ്റവും മികച്ച കാർ എന്ന പട്ടം സ്വന്തമാക്കിയ എസ്-ക്ലാസിന്റെ ഏറ്റവും പുതിയ മോഡൽ പുറത്തിറക്കി മാസങ്ങൾക്കുള്ളിൽ ഇന്ത്യൻ നിർമിത വാഹനം വിപണിയിലെത്തിച്ച് മെഴ്സിഡസ് ബെൻസ്. മഹാരാഷ്ട്രയിലെ ചക്കനിലാണ് ഈ വാഹനം നിർമ്മിക്കുന്നത്. ജൂണിലായിരുന്നു എസ്-ക്ലാസിന്റെ പുതിയ ഏഴാം തലമുറ മോഡൽ നിർമ്മാതാക്കൾ ഇന്ത്യയിൽ അവതരിപ്പിച്ചത്. പൂർണമായും വിദേശത്ത് നിർമ്മിച്ച് രാജ്യത്തേയ്ക്ക് ഇറക്കുമതി ചെയ്യുന്ന എസ്-ക്ലാസിന് രണ്ട് കോടിയിൽ അധികം വിലയായിരുന്നു. ഇതിനെ തുടർന്നാണ് ‘മെയ്ഡ്-ഇൻ-ഇന്ത്യ’ മെഴ്സിഡസ് ബെൻസ് എസ്-ക്ലാസ് നിർമ്മാതാക്കൾ വിപണിയിൽ എത്തിച്ചത്.
പ്രീമിയം പതിപ്പായ എഎംജി ട്രിം അടിസ്ഥാനമാക്കി ഇന്ത്യയിലേയ്ക്ക് ഇറക്കുമതി ചെയ്തിരുന്ന എസ്-ക്ലാസിന്റെ പെട്രോൾ പതിപ്പിന് 2.19 കോടിയും, ഡീസൽ പതിപ്പിന് 2.17 കോടിയുമായിരുന്നു വില. എന്നാൽ ഏകദേശം അറുപത് ലക്ഷം രൂപ വിലക്കുറച്ചാണ് ‘മെയ്ഡ്-ഇൻ-ഇന്ത്യ’ മെഴ്സിഡസ് ബെൻസ് എസ്-ക്ലാസ് വിപണിയിലെത്തിയിരിക്കുന്നത്. നിലവിൽ ഇന്ത്യൻ നിർമ്മിത എസ്-ക്ലാസിന്റെ പെട്രോൾ പതിപ്പിന് 1.62 കോടിയും, ഡീസൽ പതിപ്പിന് 1.57 കോടിയായും വില കുറഞ്ഞു.
ലോഞ്ച് എഡിഷന്റെ ആകർഷണമായിരുന്ന എഎംജി ലൈൻ ട്രിം ഘടകങ്ങൾ ഒഴിവാക്കിയാണ് ഇന്ത്യൻ നിർമിത മെഴ്സിഡസ് ബെൻസ് എസ്-ക്ലാസ് വില്പനക്കെത്തിയിരിക്കുന്നത്. ഇന്ത്യൻ നിർമിത മോഡലിന്റെ 19-ഇഞ്ച് അലോയ് വീലിന്റെ ഡിസൈനും വ്യത്യസ്തമാണ്. ഇന്റീരിയറിൽ 12.8 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, 12.3 ഇഞ്ച് ഡിജിറ്റൽ ഇൻസ്ട്രുമെന്റ് ഡിസ്പ്ലേ, ഫേസ്, വോയ്സ്, ഫിംഗർപ്രിന്റ് എന്നിവ പിന്തുണയ്ക്കുന്ന മെഴ്സിഡസ് എംബിയുഎക്സ് സിസ്റ്റം, 64 കളർ ആക്റ്റീവ് ആംബിയന്റ് ലൈറ്റിംഗ് എന്നിവ മാറ്റമില്ലാതെ തുടരുന്നു. എന്നാൽ ഇറക്കു മതി ചെയ്തിരുന്ന പതിപ്പിലുള്ള പ്രീമിയം ബർമസ്റ്റർ 4ഡി സറൗണ്ട് സൗണ്ട് സിസ്റ്റം ഇന്ത്യൻ നിർമ്മിത വാഹനത്തിൽ 3ഡി സറൗണ്ട് സൗണ്ട് സിസ്റ്റമായി മാറി.
ഇന്ത്യൻ നിർമിത എസ്-ക്ലാസ്സിന്റെ ഡീസൽ എൻജിനിലും വ്യത്യാസമുണ്ട്. ലോഞ്ച് എഡിഷനിലെ 325 ബിഎച്ച്പി പവറും 700 എൻഎം ടോർക്കും നിർമിക്കുന്ന 3.0 ലിറ്റർ ഡീസൽ എഞ്ചിന് പകരം 286 ബിഎച്ച്പി പവറും 600 എൻഎം ടോർക്കും നിർമ്മിക്കുന്ന ഒഎം656 ഇൻ-ലൈൻ 6 സിലിണ്ടർ, ഡീസൽ എൻജിനാണ് ഇന്ത്യൻ നിർമ്മിത മോഡലിന്. 367 ബിഎച്ച്പി പവറും 500 എൻഎം പീക്ക് ടോർക്കും നിർമ്മിക്കുന്ന 3.0 ലിറ്റർ ഇൻ-ലൈൻ ആറ് സിലിണ്ടർ പെട്രോൾ എൻജിൻ മാറ്റമില്ലാതെ തുടരുന്നു. ഇരു എൻജിനുകളും ഒമ്പത് സ്പീഡ് ഓട്ടോമാറ്റിക് ഗിയർബോക്സുമായാണ് ബന്ധിപ്പിച്ചിരിക്കുന്നത്.
നിലവിൽ മെഴ്സിഡസ് ബെൻസിന്റെ ഒൻപത് മോഡലുകൾ ഇന്ത്യയിൽ നിർമ്മിക്കുന്നുണ്ട്. എഎംജി മോഡലുകൾ ഉൾപ്പെടുയുള്ള വാഹനങ്ങളാണ് രാജ്യത്ത് നിർമ്മിക്കപ്പെടുന്നത്. ഭാവിയിൽ ബെൻസിന്റെ ഇലക്ട്രിക് കാറുകളും ചെറിയ തോതിൽ ഇന്ത്യയിൽ നിർമ്മിക്കാനും കമ്പനി പദ്ധതിയിടുന്നുണ്ട്.
