നിങ്ങൾ ഓർക്കുന്നുണ്ടോ..? ദൂരദർശനിൽ സംപ്രേഷണം ചെയ്തിരുന്ന ‘മിലേ സുർ മേരാ തുമാരാ’ എന്ന ഗാനം.. എൺപതുകളിൽ തരംഗമായിരുന്ന ഈ ഗാനം ഒരുപാട് പേരുടെ മനസിൽ മായാത്ത ഓർമയായിരിക്കും. പുറത്തിറങ്ങി 33 വർഷങ്ങൾ പിന്നിടുമ്പോൾ നമ്മിലേക്ക് വീണ്ടുമെത്തുകയാണ് ഈ ഗാനം.. പാട്ടിന്റെ ഭംഗിക്ക് യാതൊരു കോട്ടവും തട്ടാതെ ഗാനത്തിന്റെ ദൃശ്യങ്ങൾ ഇന്ത്യൻ റെയിൽവേയാണ് പുനരാവിഷ്കരിച്ചത്..
1988ൽ ദൂരദർശനും വാർത്താവിനിമയ മന്ത്രാലയവും ചേർന്ന് ‘ലോക് സേവാ സഞ്ചാർ പരിഷത്തിന്റെ’ പേരിൽ നിർമ്മിച്ച ഗാനമാണ് ഏക് സുർ അഥവാ മിലേ സുർ മേരാ തുമാരാ എന്ന ഗാനം. നാനാത്വത്തിൽ ഏകത്വം എന്ന മഹത്തായ ആശയം ജനങ്ങളിൽ ഊട്ടിയുറപ്പിക്കുകയായിരുന്നു ലക്ഷ്യം. സ്വാതന്ത്ര്യ ദിനത്തിൽ ചെങ്കോട്ടയിൽ വെച്ച് പുറത്തിറങ്ങിയ ഗാനം ജനമനസ്സുകൾ കീഴടക്കിയിരുന്നു.
വർഷങ്ങൾക്കിപ്പുറം ആസാദി കാ അമൃത് മഹോത്സവ് എന്ന പരിപാടിയുടെ ഭാഗമായാണ് റെയിൽവേ പുനരാവിഷ്കരിച്ച ഈ ഗാനം പുറത്തിറങ്ങിയിരിക്കുന്നത്. 24 മണിക്കൂറും ആഴ്ചയിൽ ഏഴ് ദിവസവും ഇന്ത്യൻ റെയിൽവേയ്ക്കായി സേവനമനുഷ്ഠിക്കുന്ന തൊഴിലാളികൾക്ക് സമർപ്പിക്കുന്നുവെന്ന് ചൂണ്ടിക്കാട്ടി പുതിയ ദൃശ്യാവിഷ്കാരം ആരംഭിക്കുന്നു. പി.വി സിന്ധു, നീരജ് ചോപ്ര, മീരാഭായ് ചാനു എന്നിവരുൾപ്പെടെ നിരവധി ഒളിമ്പിക്സ് ജേതാക്കളും മറ്റ് കായിക താരങ്ങളും ദൃശ്യാവിഷ്കാരത്തിന്റെ ഭാഗമായിട്ടുണ്ട്.
Comments