ധാക്ക : രാജ്യത്ത് വർഗ്ഗീയ കലാപത്തിന് കോപ്പ്കൂട്ടുന്ന മതമൗലികവാദികൾക്കെതിരെ സംഘടിച്ച് ബംഗ്ലാദേശിലെ ഹിന്ദുക്കൾ. ഹിന്ദുക്കൾക്കും, ക്ഷേത്രങ്ങൾക്കുമെതിരെ നടക്കുന്ന ആക്രമണങ്ങൾക്കെതിരെ പ്രതിഷേധ പ്രകടനം നടത്തി. കഴിഞ്ഞ ദിവസങ്ങളിൽ രാജ്യത്തുണ്ടായ ആക്രമണങ്ങളിൽ ഏഴോളം ഹിന്ദുക്കളാണ് കൊല്ലപ്പെട്ടത്.
ആക്രമണം അഴിച്ചുവിട്ടവർക്കെതിരെ ശക്തമായ നടപടിയെടുക്കണമെന്ന് ആവശ്യപ്പെട്ടായിരുന്നു പ്രതിഷേധം. പോസ്റ്ററുകൾ, ബാനറുകൾ, പന്തങ്ങൾ എന്നിവ കയ്യിലേന്തി ധാക്ക സർവ്വകലാശാലയ്ക്ക് മുൻപിലായിരുന്നു പ്രതിഷേധക്കാർ സംഘടിച്ചത്. നൂറിലധികം ഹിന്ദുക്കൾ പ്രതിഷേധ പ്രകടനത്തിൽ പങ്കെടുത്തു. രാജ്യത്ത് ന്യൂനപക്ഷങ്ങൾക്ക് സുരക്ഷ ഒരുക്കണമെന്നും ഹിന്ദുക്കൾ ആവശ്യപ്പെട്ടു.
കഴിഞ്ഞ വ്യാഴാഴ്ച മുതലാണ് രാജ്യത്ത് ഹിന്ദുക്കൾക്കും, ക്ഷേത്രങ്ങൾക്കും നേരെ മതമൗലിക വാദികളുടെ ആക്രമണം ആരംഭിച്ചത്. ദുർഗാ പൂജ പന്തലിൽ ഖുർആൻവെച്ചുവെന്ന് ആരോപിച്ചായിരുന്നു വ്യാപക ആക്രമണം. നിരവധി ക്ഷേത്രങ്ങളാണ് ഇതുവരെ മതമൗലികവാദികൾ തകർത്തത്. ആക്രമണങ്ങളിൽ നിരവധി പേർക്ക് പരിക്കേറ്റിട്ടുണ്ട്. ക്ഷേത്രങ്ങൾക്ക് പുറമേ ചില ഭാഗങ്ങളിൽ ഹിന്ദുക്കളുടെ വീടുകളും മതമൗലിക വാദികൾ ആക്രമിച്ചിട്ടുണ്ട്.
