മുംബൈ: ബോളിവുഡ് താരം ഷാരൂഖ് ഖാന്റെ മുംബൈ ബാന്ദ്രയിലുള്ള വസതിയായ മന്നത്തിൽ നർകോട്ടിക് കൺട്രോൾ ബ്യൂറോ (എൻസിബി) റെയ്ഡ് നടത്തി. ആഡംബരക്കപ്പലിൽ നടന്ന ലഹരി പാർട്ടിക്കിടെ ഷാരൂഖിന്റെയും ഗൗരി ഖാന്റെയും മകൻ ആര്യൻ ഖാൻ ഈ മാസം ആദ്യം അറസ്റ്റിലായിരുന്നു. അതിന് ശേഷം ഇന്ന് ഷാരൂഖ് ജയിലിലെത്തി മകനെ കണ്ടിരുന്നു. ഇതിന് പിന്നാലെയായിരുന്നു റെയ്ഡ്. നടി അനന്യ പാണ്ഡേയുടെ വീട്ടിലും എൻസിബി ഉദ്യോഗസ്ഥർ പരിശോധന നടത്തുന്നുണ്ട്.
മുംബൈ ഖർ വെസ്റ്റിലുള്ള അനന്യ പാണ്ഡെയുടേയും ചങ്കി പാണ്ഡെയുടേയും വീട്ടിലാണ് എൻസിബി റെയ്ഡ് നടത്തിയത്. അനന്യ പാണ്ഡെയോട് ഇന്ന് ഉച്ചയ്ക്ക് 2 മണിയ്ക്ക് എൻസിബി ഓഫീസിൽ ഹാജരാകാനും ആവശ്യപ്പെട്ടിട്ടുണ്ട്. ആര്യൻ ഖാനെ അൽപ്പസമയം മുൻപ് ജയിലിൽ സന്ദർശിച്ചിരുന്നു. ഇതിന് പിന്നാലെയായിരുന്നു റെയ്ഡ്. പരിശോധന ഇപ്പോഴും തുടരുകയാണെന്നാണ് വിവരം. ആര്യൻ ഖാന്റെ വാട്സ്ആപ്പ് ചാറ്റുമായി ബന്ധപ്പെട്ടാണ് അനന്യ പാണ്ഡേയുടെ വീട്ടിൽ റെയ്ഡ് നടത്തുന്നതെന്നാണ് വിവരം. അനന്യ പാണ്ഡെ കേസിൽ നിർണ്ണായക കണ്ണിയാണെന്നും എൻസിബി ഉദ്യോഗസ്ഥർ പറയുന്നു.
കഴിഞ്ഞ ദിവസം എൻസിബി ഉദ്യോഗസ്ഥർ ആര്യൻ ഖാന്റെ വാട്സാപ്പ് ചാറ്റ് കോടതിയിൽ സമർപ്പിച്ചിരുന്നു. ബോളിവുഡിലെ യുവനടിയുമായി ലഹരിമരുന്നുമായി ബന്ധപ്പെട്ട് ആര്യൻ വാട്സ്ആപ്പിലൂടെ ചാറ്റ് ചെയ്തതായും ഇതിൽ പറഞ്ഞിരുന്നു. ഈ നടി അനന്യ പാണ്ഡെ ആണെന്നാണ് ഇപ്പോൾ പുറത്ത് വരുന്ന വിവരം.
