വാഹനം വാങ്ങുമ്പോൾ നിങ്ങൾ എന്തെല്ലാം കാര്യങ്ങൾ ശ്രദ്ധിക്കാറുണ്ട്? നിറം, മോഡൽ, എഞ്ചിൻ, മൈലേജ്, അങ്ങനെ ഒരുപാട് കാര്യങ്ങൾ പരിഗണിച്ചായിരിക്കും വാഹനം തിരഞ്ഞെടുക്കുക. കാറുകൾ വാങ്ങുമ്പോൾ മികച്ച സുരക്ഷാ സംവിധാനങ്ങൾ നൽകുന്നവ തിരഞ്ഞെടുക്കാൻ ആഗ്രഹിക്കുന്നവരാണ് നാം എല്ലാവരും. എങ്ങനെ സുരക്ഷിതമായ കാർ തിരഞ്ഞെടുക്കും? അറിയാം ഇന്ത്യയിലെ സുരക്ഷിതമായ കാറുകളെ കുറിച്ച്.
ലോകമെമ്പാടുമുള്ള വാഹനങ്ങളുടെ സുരക്ഷ ഉറപ്പുവരുത്തുന്ന ഒരു ആഗോള ഓട്ടോമോട്ടീവ് സുരക്ഷാ നിരീക്ഷണ സമിതിയാണ് ന്യൂ കാർ അസസ്‌മെന്റ് പ്രോഗ്രാം അഥവാ എൻസിഎപി. 2014 മുതൽ എൻസിഎപി ‘സേഫ് കാർ ഫോർ ഇന്ത്യ’ പ്രോഗ്രാമിലൂടെ രാജ്യത്തെ കാറുകളുടെ സുരക്ഷ സംബന്ധിച്ച ഫീച്ചറുകൾ ശക്തമാക്കി. മികച്ച സുരക്ഷ ഉറപ്പു നൽകുന്ന കാറുകൾ തിരഞ്ഞെടുക്കാൻ ഉപഭോക്താക്കളെ സഹായിക്കുന്നതിനായി ക്രാഷ് ടെസ്റ്റിംഗിന്റെ അടിസ്ഥാനത്തിൽ എൻസിഎപി കാറുകൾ റേറ്റ് ചെയ്യുന്നു.
സുരക്ഷയുടെ കാര്യത്തിൽ ക്രാഷ് ടെസ്റ്റിൽ ഏറ്റവും മികച്ച പ്രകടനം നടത്തിയത് ടാറ്റ അടുത്തിടെ പുറത്തിറക്കിയ പഞ്ച് ആണ്. മുതിർന്നവരുടെ സുരക്ഷിതത്വത്തിന് അഞ്ച് സ്റ്റാറും കുട്ടികളുടേതിന് 4 സ്റ്റാറുമാണ് ഇതിന് ലഭിച്ചത്. മുതിർന്നവരുടെ സുരക്ഷയുടെ കാര്യത്തിൽ 17 പോയ്ന്റിൽ 16.45 പോയ്ന്റ് നേടിയാണ് പഞ്ച് ഏറ്റവും സുരക്ഷിതമായ ഇന്ത്യൻ നിർമിത കാറെന്ന സ്ഥാനം നേടിയത്. കുട്ടികളുടെ സുരക്ഷയിൽ 49 ൽ 40.89 പോയ്ന്റ് നേടി.
അടുത്തതായി സുരക്ഷയുടെ കാര്യത്തിൽ ഒട്ടും പിന്നിലല്ല എന്ന് തെളിയിച്ചത് മഹീന്ദ്രയും എക്‌സ് യുവി 300 ആണ്. മുതിർന്നവരുടെ സുരക്ഷയിൽ 5 സ്റ്റാർ റേറ്റിംഗും കുട്ടികളുടെ സുരക്ഷയിൽ 4 സ്റ്റാർ റേറ്റിംഗും നേടി മഹീന്ദ്ര കാർ മുൻനിരയിൽ തന്നെയുണ്ട്. ഗ്ലോബൽ എൻസിഎപിയുടെ ക്രാഷ് ടെസ്റ്റിന്റെ ഏറ്റവും ഉയർന്ന സ്‌കോർ ലഭിച്ചത് മഹീന്ദ്രയുടെ ഈ മോഡലിനാണ്.
ടാറ്റ മോട്ടോഴ്‌സിന്റെ മറ്റൊരു കാറായ ആൾട്രോസ് മുതിർന്നവരുടെ സുരക്ഷയിൽ 5 സ്റ്റാർ റേറ്റിംഗും കുട്ടികളുടെ സുരക്ഷയിൽ 3 സ്റ്റാർ റേറ്റിംഗും നേടി. മുൻവശത്ത് രണ്ട് എയർബാഗുകൾ ഉള്ള കാറിന്റെ ഘടനയും ഫൂട്ട്വെൽ ഏരിയയും മികച്ചതാണെന്ന് റേറ്റു ചെയ്യപ്പെട്ടിട്ടുണ്ട്. ഇന്ത്യയിൽ സുരക്ഷയുടെ കാര്യത്തിൽ മികവ് പുലർത്തുന്ന കാറുകളിൽ ഉൾപ്പെടുന്ന ടാറ്റായുടെ രണ്ടാമത്തെ മോഡലാണിത്.
സുരക്ഷയിൽ 4 സ്റ്റാർ റേറ്റിംഗുള്ള ടാറ്റ നെക്‌സൺ എസ്് യുവി 17ൽ 13.56 സ്‌കോറാണ് നേടിയത്. ഈ വർഷം ക്രാഷ് ടെസ്റ്റിൽ പരീക്ഷിക്കപ്പെടുന്ന ആദ്യ ഇന്ത്യൻ നിർമ്മിത കാറാണ് ടാറ്റ നെക്‌സൺ എസ് യുവി.
മുതിർന്നവരുടെ സുരക്ഷയിൽ ഏറ്റവും മികച്ചതായി നിൽകുന്ന ടൊയോട്ടയുടെ മോഡലാണ് എറ്റിയോസ്. മാത്രമല്ല മുൻപിലിരിക്കുന്ന യാത്രക്കാർക്ക് മികച്ച സുരക്ഷ ഉറപ്പ് വരുത്തിയിട്ടുണ്ട്. എന്നാൽ ക്രാഷ് ടെസ്റ്റിംഗിൽ കുട്ടികളുടെ സുരക്ഷയ്‌ക്ക് 2 സ്റ്റാർ റേറ്റിംഗ് മാത്രമാണ് വാഹനത്തിന് ലഭിച്ചത്.
മികച്ച നിലവാരമുള്ള ഡബിൾ എയർബാഗുകൾ, ഡ്രൈവർക്കുള്ള എസ്ബിആർ, ഐഎസ്ഒഫിക്‌സ് സീറ്റുകൾ എന്നിവയാണ് മഹീന്ദ്ര മരാസോയുടെ സുരക്ഷാ മുൻകരുതലുകൾ. മഹീന്ദ്ര മാരാസോ മുതിർന്നവരുടെ സുരക്ഷയിൽ 4 സ്റ്റാർ റേറ്റിംഗും കുട്ടികളുടെ സുരക്ഷയിൽ 2 സ്റ്റാർ റേറ്റിംഗും നേടി.
മുതിർന്നവരുടെയും കുട്ടികളുടെയും സുരക്ഷയിൽ ഒരേപോലെ റേറ്റിംഗ് നേടിയിരിക്കുകയാണ് മഹീന്ദ്രയുടെ ഥാർ. ക്രാഷ് ടെസ്റ്റിംഗിൽ 17 ൽ 12.52 സ്‌കോർ ചെയ്ത ഥാർ മുതിർന്നവരുടെയും കുട്ടികളുടെയും സുരക്ഷയിൽ 4 സ്റ്റാർ റേറ്റിംഗ് നേടി.
ഈ പട്ടികയിൽ ഉള്ള ഒരേയൊരു മാരുതി സുസുക്കി കാർ ആണ് വിറ്റാര ബ്രെസ്സ. ക്രാഷ് ടെസ്റ്റിംഗിൽ വിറ്റാര ബ്രെസ്സയ്‌ക്ക് 4 സ്റ്റാർ റേറ്റിംഗ് ലഭിച്ചു.
നമ്മളും കുടുംബവും സഞ്ചരിക്കുന്ന വാഹനത്തിൽ കരുത്തുറ്റ സുരക്ഷാ സംവിധാനങ്ങൾ വേണമെന്ന് ആഗ്രഹിക്കാത്തവരായി ആരും തന്നെ ഉണ്ടാവില്ല. വാഹനത്തിന്റെ മൂല്യത്തേക്കാൾ മനുഷ്യജീവന് വില കൽപ്പിക്കുന്ന സമൂഹത്തിന് ‘സേഫ് കാർ ഫോർ ഇന്ത്യ’ നടത്തുന്ന പ്രവർത്തനങ്ങൾ സഹായകരമാകും എന്നകാര്യത്തിൽ സംശയമില്ല.
