ഇടുക്കി: മുല്ലപ്പെരിയാർ അണക്കെട്ടിൽ ജലനിരപ്പ് 136 അടിയായി ഉയർന്ന സാഹചര്യത്തിൽ ആദ്യ മുന്നറിയിപ്പ് പുറപ്പെടുവിച്ച് തമിഴ്നാട്. 142 അടിയാണ് അണക്കെട്ടിന്റെ പരമാവധി സംഭരണശേഷി. നിലവിൽ ഡാമിലേയ്ക്ക് 3025 ഘനയടി വെള്ളമാണ് ഓരോ സെക്കന്റിലും എത്തുന്നതെന്നാണ് അധികൃതർ അറിയിച്ചത്.
നിലവിൽ മാനദണ്ഡങ്ങൾ പ്രകാരം അണക്കെട്ടിലെ ജലനിരപ്പ് 136 അടിയിൽ എത്തിയാൽ തമിഴ്നാട് കേരളത്തിന് ആദ്യ മുന്നറിയിപ്പ് നൽകും. 138 അടിയിൽ എത്തിയാൽ രണ്ടാമത്തെ മുന്നറിയിപ്പും നൽകും. 142 അടിയിൽ എത്തിയാൽ മാത്രമേ ഡാമിന്റെ ഷട്ടറുകൾ ഉയർത്തേണ്ട സാഹചര്യം ഉണ്ടാകു എന്നാണ് ഉദ്യോഗസ്ഥർ പറയുന്നത്.
ഇടുക്കി ഡാമിലെ ജലനിരപ്പ് താഴ്ന്നു തുടങ്ങിയതോടെ ഇന്നലെ രണ്ട് ഷട്ടറുകൾ അടച്ചിരുന്നു. ഇപ്പോൾ ഒരു ഷട്ടറിലൂടെ സെക്കന്റിൽ നാൽപ്പതിനായിരം ലിറ്റർ വെള്ളമാണ് പുറത്തേക്കൊഴുക്കുന്നത്.
