മുംബൈ: അടുത്തിടെ നടന്ന ടോക്കിയോ 2020 പാരാലിമ്പിക്സിൽ ജാവലിൻ ത്രോയിൽ ലോക റെക്കോഡോടെ സ്വർണമെഡൽ നേടിയ ഇന്ത്യൻ താരം സുമിത് ആന്റിലിന് ആദ്യ എക്സ് യുവി700 ജാവലിൻ എഡിഷൻ സമ്മാനമായി നൽകി മഹീന്ദ്ര. ട്വിറ്ററിലൂടെയാണ് നിർമ്മാതാക്കൾ ഇക്കാര്യം പങ്കുവെച്ചത്. പുരുഷന്മാരുടെ എഫ് 64 വിഭാഗത്തിലാണ് താരം സ്വർണമെഡൽ കരസ്ഥമാക്കിയത്.
ടോക്കിയോ ഒളിമ്പിക്സിലും പാരാലിമ്പിക്സിലും സ്വർണമെഡൽ കരസ്ഥമാക്കിയ ഇന്ത്യയുടെ മൂന്ന് സുവർണ്ണതാരങ്ങൾക്ക് പ്രത്യേകം രൂപകൽപ്പന ചെയ്ത എക്സ് യുവി700 എസ് യുവിയുടെ ജാവലിൻ എഡിഷൻ സമ്മാനമായി നൽകുമെന്ന് ആനന്ദ് മഹീന്ദ്ര പ്രഖ്യാപിച്ചിരുന്നു. നീരജ് ചോപ്ര, അവനി ലെഖാര, സുമിത് ആന്റിൽ എന്നിവർക്ക് മാത്രമായാണ് പ്രത്യേക പതിപ്പിന്റെ മൂന്ന് യൂണിറ്റുകൾ രൂപകൽപ്പന ചെയ്തിരിക്കുന്നത്. വാഹനത്തിന്റെ മൂന്ന് യൂണിറ്റുകളിൽ രണ്ടെണ്ണം ഭിന്നശേഷിക്കാർക്കായി പ്രത്യേക പരിഷ്ക്കരണങ്ങളോടെയാണ് മഹീന്ദ്ര തയ്യാറാക്കുന്നത്. ഇതിൽ ഒന്നാണ് സുമിത് ആന്റിലിന് നൽകിയത്.
വാഹനത്തിന്റെ മുൻവശത്തെ വെർട്ടിക്കൽ ഗ്രിൽ സ്ലാട്ടുകളിലും പിൻഭാഗത്തെ ഡെക്കലുകളിലും ബ്രാൻഡ് ലോഗോയിലും കാണാവുന്ന ഒരു സ്വർണ്ണ നിറമാണ് പ്രത്യേക പതിപ്പിൽ കാണാൻ സാധിക്കുന്നത്. വാഹനത്തിന്റെ അകത്തും ഇത്തരത്തിലുള്ള ഒരു ഗോൾഡൻ ടച്ച് നിർമ്മാതാക്കൾ നൽകിയിട്ടുണ്ട്. എക്സ് യുവി700യുടെ മറ്റ് വിശദാംശങ്ങൾ സാധാരണ മോഡലിലെ പോലെ മാറ്റമില്ലാതെ തുടരും.
മഹീന്ദ്ര ലിമിറ്റഡ് അടുത്തിടെ പുറത്തിറക്കിയ എക്സ് യുവി 700 എസ് യുവി ഇതിനോടകം തന്നെ വൻ ജനസ്വീകാര്യത നേടിയിരുന്നു. ഇതിനു തെളിവായി 14 ദിവസത്തിനുള്ള 65,000 ബുക്കിംഗ് പൂർത്തിയാക്കി റെക്കോർഡ് സൃഷ്ടിച്ചിരിക്കുകയാണ് വാഹനം.
Comments