കൊച്ചി: പുലിമുരുകന് ശേഷം മോഹൻലാൽ-വൈശാഖ് കൂട്ടുകെട്ട് വീണ്ടും ഒന്നിക്കുന്നു. പുലിമുരുകന്റെ തിരക്കഥയൊരുക്കിയ ഉദയകൃഷ്ണ തന്നെയാണ് ചിത്രത്തിന്റെ രചന നിർവ്വഹിക്കുന്നത്. ആന്റണി പെരുമ്പാവൂരാണ് നിർമ്മാണം. അതുവരെയുണ്ടായിരുന്ന ബോക്സ്ഓഫീസ് റെക്കോർഡുകൾ തകർത്തെറിഞ്ഞ ചിത്രമായിരുന്നു പുലിമുരുകൻ.
പുലിമുരുകൻ ടീം വീണ്ടും ഒന്നിക്കുന്നുവെന്ന വാർത്തകൾ പുറത്തുവന്നെങ്കിലും ഇക്കാര്യത്തിൽ കൂടുതൽ വിവരങ്ങൾ പുറത്തുവന്നിട്ടില്ല. ഷാജി കൈലാസ് സംവിധാനം ചെയ്യുന്ന ചിത്രം എലോണിന് ശേഷം മോഹൻലാൽ അഭിനയിക്കുന്ന ചിത്രമായിരിക്കും ഇത്. എറണാകുളത്ത് നവംബർ 10ന് സിനിമയുടെ ചിത്രീകരണം ആരംഭിക്കുമെന്നാണ് റിപ്പോർട്ട്.
റോഷൻ മാത്യു, അന്ന ബെൻ, ഇന്ദ്രജിത്ത് എന്നിവരെ പ്രധാന കഥാപാത്രങ്ങളാക്കി ഒരുക്കുന്ന നൈറ്റ് ഡ്രൈവാണ് വൈശാഖിന്റെ ചിത്രീകരണം നടന്നുകൊണ്ടിരിക്കുന്ന സിനിമ. മമ്മൂട്ടി നായകനാകുന്ന ന്യൂയോർക്ക്, ഉണ്ണിമുകുന്ദൻ നായകനാകുന്ന ബ്രൂസ് ലീ എന്നീ ചിത്രങ്ങളും വൈശാഖിന്റേതായി പ്രഖ്യാപിച്ചിട്ടുണ്ട്.
അതേസമയം പ്രിയദർശൻ സംവിധാനം ചെയ്ത മരക്കാറാണ് മോഹൻലാലിന്റേതായി ഇനി പുറത്തിറങ്ങാനുള്ള ചിത്രം. ബ്രോ ഡാഡി, ആറാട്ട്, ട്വൽത്ത് മാൻ എന്നീ മോഹൻലാൽ ചിത്രങ്ങളുടെ ചിത്രീകരണം പൂർത്തിയായിട്ടുണ്ട്.
