തിരുവനന്തപുരം : ദേശീയപാതയിൽ ഗതാഗതം തടസപ്പെടുത്തി സമരം ചെയ്തത് ചോദ്യം ചെയ്ത നടൻ ജോജു ജോർജിന് പിന്തുണയുമായി വിദ്യാഭ്യസ മന്ത്രി വി ശിവൻകുട്ടി രംഗത്ത് .ജോജു ജോർജിനെ ആക്രമിച്ച സംഭവത്തിൽ കോൺഗ്രസിന് എതിരെ രൂക്ഷ വിമർശമാണ് മന്ത്രി നടത്തിയത്.
അഭിപ്രായ സ്വാതന്ത്രം മാനിക്കാതെ കായികമായി പ്രശ്നം നേരിടാനാണ് കോൺഗ്രസ് ശ്രമിച്ചതെന്ന് മന്ത്രി ആരോപിച്ചു. ജോജു മദ്യപിച്ചിട്ടുണ്ട് എന്നടക്കമുള്ള നുണകൾ ഉന്നയിക്കാനും കോൺഗ്രസ് തയ്യാറായി. ‘ഗുണ്ട’ എന്നാണ് കെ പി സി സി അധ്യക്ഷൻ ജോജുവിനെ വിശേഷിപ്പിച്ചതെന്ന് മന്ത്രി കൂട്ടിച്ചേർത്തു.
കോൺഗ്രസ് എത്ര മോശം സംസ്കാരമാണ് ഉയർത്തിപ്പിടിക്കുന്നത് എന്ന് തെളിയിക്കുന്നതാണ് കൊച്ചിയിൽ നടന്ന സംഭവങ്ങളെന്നും പ്രതിഷേധിക്കാനുള്ള അവകാശം കോൺഗ്രസിനുള്ളത് പോലെ അഭിപ്രായം പറയാനുള്ള സ്വാതന്ത്ര്യം ജോജുവിനും ഉണ്ടെന്നുള്ളതാണ് യഥാർത്ഥ ജനാധിപത്യത്തിന്റെ ഉൾക്കാമ്പെന്നും മന്ത്രി തന്റെ ഫേസ്ബുക്ക് പോസ്റ്റിൽ കുറിച്ചു.
Comments