തിരുവനന്തപുരം: പണിമുടക്കിൽ പങ്കെടുക്കാത്ത കെഎസ്ആർടിസി ജീവനക്കാരെ ഉപയോഗിച്ച് പരമാവധി സർവീസുകൾ നടത്താൻ കെഎസ്ആർടിസിക്ക് നിർദ്ദേശം നൽകി സിഎംഡി. നാളെ നടത്തുന്ന പണിമുടക്കിൽ ഒരുവിഭാഗം ജീവനക്കാർ മാത്രമാണ് പങ്കെടുക്കുന്നത്. ഇതിനെ തുടർന്നാണ് പണിമുടക്കിൽ പങ്കെടുക്കാത്ത ജീവനക്കാരെ ഉൾപ്പെടുത്തി സർവീസ് നടത്താൻ കെഎസ്ആർടിസിക്ക് നിർദ്ദേശം നൽകിയിരിക്കുന്നത്.
സർവീസ് നടത്താൻ പരമാവധി സൗകര്യം ഒരുക്കാൻ യൂണിറ്റ് ഓഫീസർമാർക്ക് സിഎംഡി നിർദ്ദേശം നൽകിയിട്ടുണ്ട്. സമരത്തിൽ പങ്കെടുക്കാതെ ഹാജരാകുന്ന ജീവനക്കാരെ ഉപയോഗിച്ച് സർവീസുകൾ അയയ്ക്കണമെന്നും ഇതിനായി ജീവനക്കാരെ മുൻകൂട്ടി നിയോഗിക്കണമെന്നുമാണ് നിർദ്ദേശം.
വാരാന്ത്യദിനത്തിൽ വിവിധ സ്ഥലങ്ങളിൽ നിന്നും വീട്ടിലേയ്ക്ക് തിരികെ എത്താൻ കാത്തിരിക്കുന്നവർക്ക് ബുദ്ധിമുട്ടുണ്ടാകാതെ സർവീസുകൾ നടത്തണം. ഹാജരാകുന്ന ജീവനക്കാർക്ക് ഡബിൾ ഡ്യൂട്ടി ഉൾപ്പെടെ നൽകി യാത്രക്കാർക്ക് യാതൊരു ബുദ്ധിമുട്ടും വരുത്തില്ലെന്ന് സിഎംഡി അറിയിച്ചു. ആവശ്യ റൂട്ടുകൾക്ക് പ്രാധാന്യം നൽകി ദീർഘദൂര സർവീസുകൾ, ഒറ്റപ്പെട്ട സർവീസുകൾ, പ്രധാന റൂട്ടുകളിലെ സർവീസുകൾ എന്നിങ്ങനെ അയക്കുന്നതിനും റിസർവേഷൻ നൽകിയിട്ടുള്ള സർവീസുകൾ എന്നിവ നടത്തുകയും ചെയ്യും.
