ന്യൂഡല്ഹി: ഇന്ത്യന് മത്സ്യത്തൊഴിലാളിയെ വെടിവച്ച് കൊലപ്പെടുത്തിയ സംഭവത്തില് പാകിസ്താന് മാരിടൈം സെക്യൂരിറ്റി ഏജന്സിയിലെ 10 നാവികസേനാ ഉദ്യോഗസ്ഥര്ക്കെതിരെ കേസ്. പോര്ബന്തറിലെ നേവി ബന്തര് പോലീസാണ് കേസ് രജിസ്റ്റര് ചെയ്തത്. വെടിവയ്പ്പില് പരിക്കേറ്റ ദിലീപ് നാതു സോളങ്കിയുടെ പരാതിയിലാണ് പോലീസ് കേസ് രജിസ്റ്റര് ചെയ്തിരിക്കുന്നത്. കഴിഞ്ഞ ദിവസമാണ് ഗുജറാത്ത് തീരത്തിനപ്പുറം അന്താരാഷ്ട്ര സമുദ്രാതിര്ത്തിയോട് ചേര്ന്ന് ഇന്ത്യന് മത്സ്യബന്ധന ബോട്ടിന് നേരെ പാക് സേനയുടെ വെടിവയ്പ്പ് ഉണ്ടായത്.
മഹാരാഷ്ട്രയില് നിന്നുള്ള മത്സ്യത്തൊഴിലാളിയായ ശ്രീധര് രമേശ് ചംരെ (32) ആണ് കൊല്ലപ്പെട്ടത്. ഇവര് സഞ്ചരിച്ചിരുന്ന ജല്പ്പരി എന്ന ബോട്ടിന് നേരെയായിരുന്നു വെടിവയ്പ്പ് നടന്നത്. ഏഴ് പേരടങ്ങുന്ന സംഘമാണ് ബോട്ടില് ഉണ്ടായിരുന്നത്. സംഭവം നടന്ന ഉടനെ തന്നെ ഇരുവരേയും ഗുജറാത്തിലെ ഓഖ ആശുപത്രിയില് പ്രവേശിപ്പിച്ചെങ്കിലും ശ്രീധറിന്റെ ജീവന് രക്ഷിക്കാനായില്ല. സംഭവത്തില് അന്വേഷണം പുരോഗമിക്കുകയാണെന്നും എല്ലാ ഭാഗങ്ങളും പരിശോധിച്ച ശേഷം മാത്രമേ കാര്യങ്ങള് പറയാനാകൂ എന്നും കോസ്റ്റ് ഗാര്ഡ് വ്യക്തമാക്കി.
Comments