ഹൈദരാബാദ്: ഐപിഎല്ലിലെ വിരാട് കോലിയുടെ പതിഞ്ഞ ബാറ്റിംഗിനെതിരെ ആരാധകർ. ഹൈദരാബാദിനെതിരെ മികച്ച തുടക്കം ലഭിച്ചിട്ടും പവർ പ്ലേക്ക് ശേഷം ഒറ്റ ബൗണ്ടറി പോലും നേടാതെ 41 പന്തിൽ നിന്ന് അർദ്ധ സെഞ്ച്വറി നേടിയതിനെതിരെയാണ് ആരാധകർ സമൂഹമാദ്ധ്യമങ്ങളിൽ ഉൾപ്പെടെ രൂക്ഷവിമർശനുമുയർത്തിയത്. പവർ പ്ലേയിൽ 32 റൺസെടുത്ത കോലി പിന്നീട് നേരിട്ട 27 പന്തിൽ നേടിയത് 19 റൺസ് മാത്രമാണ്.
രജത് പട്ടീദാറിന്റെ അർദ്ധ സെഞ്ച്വറിയാണ് ആർസിബിയെ 200 കടത്താൻ സഹായിച്ചത്. 19 പന്തിൽ പട്ടീദാർ അർദ്ധസെഞ്ച്വറിയിലെത്തിയപ്പോൾ 41 പന്തിൽ നിന്നാണ് കോലി 50 റൺസ് നേടിയത്. ടി20 ലോകകപ്പിൽ രോഹിത് ശർമ്മയ്ക്കൊപ്പം ഓപ്പണിംഗിനിറങ്ങിയ കോലിയുടെ മെല്ലെപ്പോക്ക് ആരാധകരെ ഞെട്ടിക്കുകയും ചെയ്തു.
ഫിഫ്റ്റിക്ക് ശേഷം കോലി തകർത്തടിക്കുമെന്ന് കരുതിയെങ്കിലും അതും ഉണ്ടായില്ല. 51 റൺസെടുത്ത് താരം പുറത്തായി. കോലിയുടെ മെല്ലപ്പോക്ക് ആർസിബിയുടെ സ്കോറിംഗിന് തിരിച്ചടിയാവുകയും ചെയ്തു. നാല് ഫോറും ഒരു സിക്സും അടങ്ങുന്നതായിരുന്നു താരത്തിന്റെ ഇന്നിംഗ്സ്.