ജപ്പാനിൽ വളരുന്ന യുബാരി മെലൺ എന്ന പഴം. പേര് സിംപിൾ ആണെങ്കിലും ആള് പവ്വർ ഫുൾ ആണ്. കിലോയ്‌ക്ക് 20 ലക്ഷം രൂപയാണ് ഈ വിവിഐപി പഴത്തിന്റെ വില.
കൃഷിരീതിയിലും രുചിയിലും നിരവധി പുതുമകളോടെ ഓരോ ദിവസവും പുതിയ ഇനം പഴങ്ങളും പച്ചക്കറികളും ലോകത്തെ വിവിധ മാർക്കറ്റുകളിൽ എത്താറുണ്ട്. ആ കൂട്ടത്തിലേക്കാണ് യുബാരി തണ്ണിമത്തൻ എന്ന പഴത്തിന്റെ വരവ്. മത്തൻ വർഗത്തിൽപ്പെട്ട യുബാരി മെലണിന് സ്വർണ്ണത്തിനേക്കാൾ വിലയുണ്ട്.
ലോകത്തിലെ ഏറ്റവും വിലകൂടിയ പഴമാണ് യുബാരി തണ്ണിമത്തൻ . ഒരു കിലോയ്‌ക്ക് 20 ലക്ഷം രൂപ വിലയാണ് ഇവയ്‌ക്കുള്ളത്. ഈ പഴത്തിന്റെ വിലയ്‌ക്ക് ഒരാൾക്ക് സ്വർണ്ണമോ ഒരു തുണ്ട് ഭൂമിയോ വാങ്ങാം. ജപ്പാനാണ് യുബാരി തണ്ണിമത്തന്റെ നാട്. എങ്കിലും എളുപ്പത്തിൽ ഈ പഴം ലഭിക്കണമെന്നില്ല. വർഷത്തിൽ ഏത് സമയത്തും കായ്ഫലമുണ്ടാകും എന്നതാണ് ഇവയുടെ മറ്റൊരു സവിശേഷത.
കച്ചവടക്കാർക്കും , റസ്റ്റോറന്റുകാർക്കുമൊന്നും ഈ പഴം ലഭിക്കാറില്ല. രാജ്യത്തുടനീളം സമ്പന്നർക്കിടയിൽ ഇതിന് ആവശ്യക്കാരുണ്ട്. ജപ്പാനിലെ യുബാരി മേഖലയിൽ ഹൊക്കൈഡോ പ്രിഫെക്ചറിലെ ഒരു പ്രത്യേക പ്രദേശത്ത് മാത്രമേ ഇവ വളർത്താൻ കഴിയൂ. കർഷകരുടെ അടുത്തു നിന്നും ലേലത്തിൽ പഴങ്ങൾ വാങ്ങിക്കുന്ന പ്രത്യേക സ്റ്റേറുകളിൽ മാത്രമെ ഇവ ലഭിക്കുകയുള്ളൂ.
ഈ പഴം കൃഷി ചെയ്യുന്ന രീതിയും തികച്ചും വ്യത്യസ്തമാണ്. യുബാരി പ്രദേശത്തെ അഗ്നിപർവ്വത ചാരമുള്ള മണ്ണാണ് തണ്ണിമത്തൻ വളരാൻ കൂടുതലും സഹായിക്കുന്നത്. 25 മുതൽ 28 ഡിഗ്രി സെൽഷ്യസ് വരെ താപനിലയിൽ സൂക്ഷിക്കേണ്ടതിനാൽ തണ്ണിമത്തൻ ഹരിതഗൃഹത്തിനുള്ളിലാണ് വളരുന്നത്. അതിനാൽ തന്നെ ഇവ വൻതോതിൽ കൃഷി ചെയ്യപ്പെടാറുമില്ല.
ഹൊക്കൈഡോയുടെ വടക്കൻ കാലാവസ്ഥയുടെ സൂര്യപ്രകാശമുള്ള പകലുകളിലും തണുത്ത രാത്രികളിലും തണ്ണിമത്തൻ മികച്ച രീതിയിൽ വളരും. ഇതാണ് യുബാരി തണ്ണിമത്തനെ ഇത്ര രുചികരമാക്കുന്നത്. മാത്രമല്ല, യുബാരി മെലൺ വളരെക്കാലം സൂക്ഷിക്കാൻ കഴിയില്ല. പാകമായതിനു ശേഷം വളരെ വേഗം കഴിക്കുകയും വേണം.
ഉയർന്ന നിലവാരമുള്ള ഈ പഴം തികച്ചും വൃത്താകൃതിയിലുള്ളതും അസാധാരണമാംവിധം മിനുസമാർന്ന പുറംതൊലി ഉള്ളതുമാണ്. ഷാംപെയ്ൻ, ബർബൺ, കോബി ബീഫ് തുടങ്ങിയ നിരവധി ആഡംബര ഭക്ഷണ പാനീയങ്ങൾ പോലെ, യുബാരി തണ്ണിമത്തനും അമൂല്യമായ ഭക്ഷണമായാണ് ലോകത്തെ ഭക്ഷണപ്രേമികൾ കാണുന്നത് . 2019ൽ രണ്ട് യുബാരി തണ്ണിമത്തൻ 42,450 ഡോളറിനാണ് വിറ്റത്. അതായത് ഏകദേശം 31.6 ലക്ഷം രൂപ
ഓരോ മത്തനും പൂർണ വളർച്ചയെത്താൻ 100 ദിവസം വരെ എടുക്കും. ഇത്രയും വിലപിടിപ്പുള്ളതായതുകൊണ്ടുതന്നെ കർഷകർ പ്രത്യേക ശ്രദ്ധയും പരിചരണവുമാണ് ഓരോ പഴത്തിനും നൽകുന്നത്
മെയ് അവസാനം മുതൽ ഓഗസ്റ്റ് ആദ്യം വരെ മാത്രമേ പഴം പാകമാകൂ. യുബാരി തണ്ണിമത്തൻ വളർത്താൻ ഉപയോഗിക്കുന്ന പാടങ്ങളുടെ എണ്ണവും പരിമിതമാണ്. കിലോയ്‌ക്ക് 20 ലക്ഷം നൽകിയാണെങ്കിലും യുബാരി തണ്ണിമത്തൻ വാങ്ങാൻ ആളുകളുണ്ടെന്നതാണ് യാഥാർത്ഥ്യം.
