പോലീസിന്റെ കരുണ; ചെന്നൈയിൽ വെള്ളപ്പൊക്കത്തിൽപ്പെട്ട് ബോധരഹിതനായ യുവാവിനെ തോളിൽ ചുമന്ന് വനിത പോലീസ് ഇൻസ്‌പെക്ടർ; വൈറലായി ദൃശ്യങ്ങൾ

ചെന്നൈ: തമിഴ്‌നാട്ടിൽ തുടരുന്ന ശക്തമായ മഴയിൽ ചെന്നൈ നഗരത്തിലെ വിവിധ പ്രദേശങ്ങൾ വെള്ളത്തിനടിയിലായിരിക്കുകയാണ്. ടിപി ഛത്രം ശ്മശാനത്തിനു സമീപം വെള്ളക്കെട്ടിൽ പെട്ട് ബോധരഹിതനായ യുവാവിനെ തോളിൽ ചുമന്ന് രക്ഷപ്പെടുത്തുന്ന വനിത ഇൻസ്‌പെക്ടറുടെ ദൃശ്യങ്ങൾ ഇപ്പോൾ സമൂഹ മാദ്ധ്യമങ്ങളിൽ വൈറലായിരിക്കുകയാണ്.

വനിത ഇൻസപെക്ടറായ രാജേശ്വരിയാണ് വെള്ളക്കെട്ടിൽ പെട്ട് ബോധരഹിതനായ യുവാവിനെ തോളിൽ ചുമന്ന ശേഷം ഓട്ടോയിൽ കയറ്റി അടുത്തുള്ള ആശുപത്രിയിൽ എത്തിച്ചത്. രാജേശ്വരിയുടെ ഈ പ്രവൃത്തിയെ പ്രശംസിച്ച് ധാരാളം ആളുകൾ രംഗത്തെത്തി. ദൃശ്യങ്ങൾ വൈറലായതോടെ ഇൻസ്‌പെക്ടർക്ക് അഭിനന്ദന പ്രവാഹമാണ് ലഭിച്ചത്.

#WATCH | Chennai, Tamil Nadu: TP Chatram Police Station's Inspector Rajeshwari carries an unconscious man, on her shoulders, to an autorickshaw in a bid to rush him to a nearby hospital.

Chennai is facing waterlogging due to incessant rainfall here.

(Video Source: Police staff) pic.twitter.com/zrMInTqH9f

— ANI (@ANI) November 11, 2021

28 വയസുകാരനായ യുവാവാണ് വെള്ളക്കെട്ടിൽ അകപ്പെട്ടതിനെ തുടർന്ന് ടിപി ഛത്രം ശ്മശാനത്തിനു സമീപം ബോധരഹിതനായി വീണത്. തമിഴ്‌നാട്ടിൽ തുടരുന്ന ശക്തമായ മഴയിൽ ഇതുവരെ 12 ജീവനുകളാണ് പൊലിഞ്ഞത്. കനത്ത മഴയിൽ വ്യാപകമായ നാശനഷ്ടങ്ങളും റിപ്പോർട്ട് ചെയ്തിട്ടുണ്ട്. എഗ്മോർ, പെരമ്പൂർ എന്നീ പ്രദേശങ്ങളിൽ മരങ്ങൾ കടപുഴകി വീണ് വീടുകളും റോഡുകളും തകർന്നതായി പോലീസ് അറിയിച്ചു.

നിലവിൽ തമിഴ്‌നാടിന് വടക്ക് കിഴക്കായുള്ള ന്യൂനമർദ്ദം വൈകിട്ടോടെ ശക്തി പ്രാപിച്ച് തീവ്രന്യൂനമർദ്ദമായി മാറുമെന്നാണ് കാലാവസ്ഥ നിരീക്ഷണ കേന്ദ്രം അറിയിച്ചത്. മഴ തുടരുന്ന സാഹചര്യത്തിൽ ചെന്നൈയിലെ പ്രധാനപ്പെട്ട ഏഴ് റോഡുകളും 11 സബ് വേകളും അടച്ചു.