ദുബായ്: ടി20 ലോകകപ്പിൽ ന്യൂസിലൻഡിനെ കീഴടക്കി ഓസ്ട്രേലിയ ലോകകപ്പ് ചാമ്പ്യന്മാർ ആയിരിക്കുകയാണ്. ദുബായ് അന്താരാഷ്ട്ര സ്റ്റേഡിയത്തിൽ ഇന്നലെ നടന്ന ഫൈനൽ പോരാട്ടത്തിൽ ന്യൂസിലൻഡിനെ എട്ട് വിക്കറ്റിനാണ് ഓസ്ട്രേലിയ തോൽപ്പിച്ചത്. ടി20 ലോകകപ്പ് ചരിത്രത്തിലെ ഓസ്ട്രേലിയയുടെ ആദ്യത്തെ കിരീടനേട്ടം കൂടിയായിരുന്നു ഇന്നലത്തേത്.
കിരീടം നേടിയതിന് ശേഷം ഓസീസ് താരങ്ങൾ നടത്തിയ വിജയാഘോഷത്തിന്റെ വീഡിയോകളിലൊന്നാണ് ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുന്നത്. അന്താരാഷ്ട്ര ക്രിക്കറ്റ് കൗൺസിലിന്റെ ട്വിറ്റർ പേജിൽ പങ്കുവെച്ചിരിക്കുന്ന വീഡിയോയിൽ ഓസീസ് താരങ്ങളായ മാത്യു വെയ്ഡും മാർക്കസ് സ്റ്റോയ്നിസുമാണുള്ളത്. ഇവർ ഷൂസിൽ ബിയർ ഒഴിച്ച് കുടിക്കുന്നതാണ് വീഡിയോയിൽ കാണാനാകുക.
കിരീടനേട്ടത്തിന് പിന്നാലെ റൂമിലെത്തിയ ഓസീസ് സംഘം വിജയം ആഘോഷിക്കുന്നതിനിടയിൽ ടീമിലെ വിക്കറ്റ് കീപ്പറായ വെയ്ഡ് താൻ കാലിൽ ഇട്ടിരുന്ന ഷൂസ് ഊരുകയും തുടർന്ന് അതിലേക്ക് ബിയർ ഒഴിച്ച് കുടിക്കുകയുമായിരുന്നു. താരത്തിന്റെ കയ്യിൽ നിന്നും അതേ ഷൂ വാങ്ങിയ മാർക്കസ് സ്റ്റോയ്നിസും ബിയർ ഷൂസിലേക്ക് ഒഴിച്ച് കുടിക്കുന്നതും വീഡിയോയിൽ കാണാം.
ഫൈനൽ പോരാട്ടത്തിൽ ടോസ് നഷ്ടപ്പെട്ട് ബാറ്റിംഗിന് ഇറങ്ങിയ കിവീസ് നാല് വിക്കറ്റ് നഷ്ടത്തിൽ 172 റൺസ് നേടി. ഓസീസ് 18.5 ഓവറിൽ രണ്ട് വിക്കറ്റ് മാത്രം നഷ്ടത്തിൽ കിരീടം നേടുകയായിരുന്നു. അടുത്തമാസം എട്ടിന് തുടങ്ങുന്ന ആഷസ് ടെസ്റ്റ് പരമ്പരയിലാണ് ഓസ്ട്രേലിയൻ ടീം ഇനി കളിക്കുക.
Matthew Wade and Marcus Stoinis drunk wine after engulfing on shoe 👠 😱😲#T20WorldCup #AUSvNZ #T20WCFinal #AusvsNZ #Australia #NZvsAUSpic.twitter.com/YIuu7pO0Ll
— CRICKET VIDEOS 🏏 (@AbdullahNeaz) November 15, 2021
