തിരുവനന്തപുരം:നിയമസഭാകയ്യാങ്കളിക്കേസിൽ മന്ത്രി വി ശിവൻകുട്ടി അടക്കമുള്ള പ്രതികൾ ഹൈക്കോടതിയിൽ പുന:പരിശോധന ഹർജി നൽകി.നേരത്തെ ഇവർ നൽകിയ വിടുതൽ ഹർജി തള്ളിയിരുന്നു. ഇതിനെതിരെയാണ് റിവ്യൂ ഹർജി നൽകിയത്.കേസിൽ ഹൈക്കോടതി സർക്കാരിന്റെ നിലപാട് തേടി.
ഇന്ന് സമർപ്പിച്ച ഹർജിയിൽ പ്രതികൾ കേസിൽ നിരപരാധികളാണെന്ന് ചൂണ്ടിക്കാട്ടി. കൂടാതെ കേസിന്റെ വിചാരണ താൽക്കാലികമായി നിർത്തി വെയ്ക്കാൻ ഉത്തരവിടണെന്നും പ്രതികൾ ആവശ്യപ്പെട്ടു.
കേസിൽ ഇന്ന് വിചാരണ നടപടികൾ ആരംഭിച്ചിരുന്നു. തിരുവനന്തപുരം സിജെഎം കോടതിയിലാണ് വിചാരണ നടപടികൾ നടക്കുന്നത്.മന്ത്രി വി ശിവൻകുട്ടി അടക്കമുള്ള പ്രതികൾ ഇന്ന് കോടതിയിൽ ഹാജരായിരുന്നില്ല.
കയ്യാങ്കളിക്കേസ് ഡിസംബർ 22ന് പരിഗണിക്കാനായി വിചാരണ കോടതി മാറ്റിയിരുന്നു. ഇതിനിടെയാണ് പുനഃപരിശോധനാ ഹർജിയുമായി പ്രതികൾ ഹൈക്കോടതിയെ സമീപിച്ചത്.
