അനുവാദമില്ലാതെ കൂട്ടുകാരൻ പെൻസിലെടുത്തു . എത്ര ചോദിച്ചിട്ടും തിരിച്ചു തരുന്നില്ല. ഒടുവിൽ പരാതി പറയാൻ നേരെ പോയി, പൊലീസ് സ്റ്റേഷനിലേക്ക് . കേൾക്കുമ്പോൾ ചിരി വരുമെങ്കിലും സംഭവം ഗൗരവമുള്ളതാണ്. ആന്ധ്രാപ്രദേശിലെ കുർണൂൽ ജില്ലയിലെ പേട കഡുബുരു പൊലീസ് സ്റ്റേഷനിലേക്കാണ് പരാതിയുമായി കുട്ടിക്കൂട്ടം എത്തിയത്.
ആന്ധ്രാപ്രദേശ് പൊലീസ് ഔദ്യോഗിക ട്വിറ്റർ പേജിലാണ് ഈ പരാതി പരിഹരിക്കുന്ന വീഡിയോ പങ്കിട്ടിരിക്കുന്നത്. ഭാഷ മനസ്സിലാകുന്നില്ലെങ്കിലും കുട്ടിപട്ടാളത്തിന്റെ സംസാരവും ആക്ഷനും കാണുമ്പോൾ തന്നെ ആർക്കും ചിരിവരും. സഹപാഠി പെൻസിലെടുത്തെന്നാണ് പോലീസിനോട് ഒരാളുടെ പരാതി.
പെൻസിലെടുത്ത കുട്ടിക്കെതിരെ കേസെടുക്കണമെന്നും പരാതിക്കാരൻ ആവശ്യപ്പെടുന്നുണ്ട്. കേസെടുത്ത് ജയിലിലയച്ചാൽ അവന്റെ ജീവിതം ബുദ്ധിമുട്ടിലാകില്ലേ അതുകൊണ്ട് രമ്യമായി പരിഹരിക്കാം എന്നാണ് പോലീസുകാരൻ നൽകുന്ന മറുപടി. ഒടുവിൽ തർക്കം പറഞ്ഞു തീർത്ത് പരസ്പരം ഷേക്ക് ഹാൻഡ് കൊടുത്തിട്ടാണ് കുട്ടികളെ പോലീസ് പറഞ്ഞയക്കുന്നത്.
