കഞ്ചാവ് കൃഷിക്ക് പേരുകേട്ട രാജ്യമാണ് മലാവി. ഇവിടത്തെ മലാവി ഗോൾഡ് എന്ന ഇനം കഞ്ചാവ് ലോക പ്രശസ്തമാണ്. കഞ്ചാവ് നിയമവിധേയമാക്കുന്ന പുതിയ സാദ്ധ്യതകൾ പൂർണമായി ഉപയോഗപ്പെടുത്താനാണ് ഇപ്പോൾ മലാവി എന്ന രാജ്യത്തിന്റെയും അവിടുത്തെ സർക്കാരിന്റെയും നീക്കം. എന്നാൽ വ്യക്തിപരമായ ആവശ്യങ്ങൾക്കായി കഞ്ചാവ് ഉപയോഗിക്കുന്നത് രാജ്യത്ത് നിയമവിധേയമാക്കിയിട്ടില്ലെന്നതും ശ്രദ്ധേയമാണ്.
മലാവിയിൽ ബോക്സറായ മൈക്ക് ടൈസൻ കഞ്ചാവിന്റെ ബ്രാൻഡ് അംബാസിഡറാകാൻ ഒരുങ്ങുന്നു എന്ന വാർത്ത കഴിഞ്ഞ ദിവസമാണ് പുറത്തുവന്നത്. രാജ്യത്തെ കഞ്ചാവ് കൃഷിയുടെ ഔദ്യോഗിക അംബാസഡറാകാൻ മൈക്ക് ടൈസനെ ക്ഷണിച്ചിരിക്കുകയാണ് സർക്കാർ. രാജ്യത്തെ കൃഷി മന്ത്രിയായ ലോബിൻ ലോ ഇക്കാര്യം അഭ്യർത്ഥിച്ച് ടൈസന് കത്തയച്ചിട്ടുണ്ട്. കഴിഞ്ഞ വർഷമാണ് മെഡിക്കൽ, വ്യാവസായിക ആവശ്യങ്ങൾക്കായി കഞ്ചാവ് വളർത്തുന്നത് മലാവിയിൽ നിയമവിധേയമാക്കിയിയത്. ഇതോടെ രാജ്യത്ത് ധാരാളം പുതിയ തൊഴിലവസരങ്ങൾ സൃഷ്ടിക്കപ്പെട്ടുവെന്നാണ് ലോബിൻ ലോയുടെ വാദം.
ഇനി ബോക്സിങ് താരമായ മൈക്ക് ടൈസനിലേക്ക് വന്നാൽ, റിങ്ങിൽ 1990കളിലെ താരമായിരുന്നു മൈക്ക് ടൈസൻ. മുൻ ലോക ഹെവിവെയ്റ്റ് ചാമ്പ്യൻ കൂടിയായ ടൈസന് യുഎസിൽ ഒരു കഞ്ചാവ് ഫാമും സ്വന്തമായിട്ടുണ്ട്. അമേരിക്കയിലെ കഞ്ചാവ് അസോസിയേഷനുമായും അടുത്ത് പ്രവർത്തിക്കുന്ന വ്യക്തികൂടിയാണ് ടൈസൻ. കഞ്ചാവ് വലിക്കുന്നത് തന്റെ മാനസികാരോഗ്യം മെച്ചപ്പെടുത്തിയെന്നും ജീവിതം ഏറെ മനോഹരമാക്കി മാറ്റാൻ സഹായിച്ചെന്നുമാണ് ടൈസൻ പറയുന്നത്. മലാവിയിൽ ബ്രാൻഡ് അംബാസിഡറാകാനുള്ള ക്ഷണം ടൈസൻ സ്വീകരിച്ചതായും മലാവി കൃഷി മന്ത്രി സൂചന നൽകിയിട്ടുണ്ട്.
ഔഷധ നിർമ്മാണ ആവശ്യങ്ങൾക്കും വ്യാവസായിക ആവശ്യങ്ങൾക്കും കഞ്ചാവ് വളർത്താൻ ആളുകളെ പ്രേരിപ്പിക്കുക എന്നതാണ് ടൈസനെപോലെ ഒരാളെ അംബാസിഡറാക്കുന്നതിലൂടെ ലക്ഷ്യമിടുന്നത് എന്നാണ് കൃഷി മന്ത്രാലയം പറയുന്നത്. ടൈസന്റെ സാന്നിദ്ധ്യം കഞ്ചാവ് കൃഷിയിലേക്ക് കൂടുതൽ പേരെ ആകർഷിക്കുമെന്നും കൂടുതൽ നിക്ഷേപങ്ങൾ ഉണ്ടാകുമെന്നുമാണ് മലാവിയുടെ പ്രതീക്ഷ.
എന്നാൽ മൈക്ക് ടൈസനെ എതിർത്തും രാജ്യത്ത് ചില വിമർശനങ്ങൾ ഉയരുന്നുണ്ട്. ബലാത്സംഗ കുറ്റത്തിന് ജയിലിലായ ഒരാളെ ബ്രാൻഡ് അംബാസിഡർ സ്ഥാനത്തേക്ക് കൊണ്ടുവരുന്നത് ശരിയായ നടപടിയല്ലെന്നാണ് വിമർശനം. മലാവി സിവിൽ സൊസൈറ്റി ഗ്രൂപ്പായ ‘സെന്റർ ഫോർ പബ്ലിക് അക്കൗണ്ടബിലിറ്റി’യാണ് ഇക്കാര്യം അറിയിച്ചത്. ബലാത്സംഗക്കേസിൽ മൂന്ന് വർഷത്തിലേറെ തടവ് ശിക്ഷ അനുഭവിച്ച വ്യക്തിയാണ് മൈക്ക് ടൈസൻ. പല സംഘടനകളും ഇക്കാര്യം ചൂണ്ടിക്കാട്ടി വിമർശനങ്ങളുമായി മുന്നോട്ട് വരുമ്പോഴും ഇക്കാര്യങ്ങൾ പരിഗണിക്കേണ്ടതില്ലെന്നാണ് സർക്കാർ നിലപാട്.
ഇത്തരത്തിൽ മെഡിക്കൽ ആവശ്യങ്ങൾക്കായി കഞ്ചാവ് നിയമവിധേയമാക്കിയ ആദ്യ രാജ്യമല്ല മെലാവി. ചില രാജ്യങ്ങളിൽ ചായക്കടയിൽ പോലും കഞ്ചാവ് കിട്ടുമെന്ന് ചിലർ പറയാറുണ്ട്. അത്തരത്തിലൊരു രാജ്യമാണ് നെതർലാൻഡ്സ്. ഇവിടെ ലോലിപോലിന്റെയും കേക്കിന്റെയും രൂപത്തിൽ തുടങ്ങി പലവിധത്തിൽ കഞ്ചാവ് കടയിൽ നിന്ന് ലഭിക്കും. കോഫീഷോപ്പുകൾ അഥവാ കഫേകൾ എന്നാണ് ഇത്തരം ഇടങ്ങളെ സംബോധന ചെയ്യുക. നെതർലാൻഡ്സിന് സമാനമായി കാനഡ, ജമൈക്ക, ഉറുഗ്വായ്, ദക്ഷിണാഫ്രിക്ക, സ്പെയിൻ, കൊളംബിയ തുടങ്ങി പല രാജ്യങ്ങളിലും നിബന്ധനകളോടെ കഞ്ചാവ് ഉപയോഗം നിയമവിധേയമാക്കിയിട്ടുണ്ട്.
Comments