ലണ്ടൻ : ഒമിക്രോൺ ഭയത്തിനിടയിലും ആഫ്രിക്കൻ രാജ്യങ്ങളെ സഹായിക്കാൻ തയ്യാറായ ഇന്ത്യയേയും, പ്രധാനമന്ത്രി നരേന്ദ്രമോദിയേയും അഭിനന്ദിച്ച് മുൻ ഇംഗ്ലണ്ട് ക്യാപ്റ്റൻ കെവിൻ പീറ്റേഴ്സൺ.
“ഇന്ത്യ ഒരിക്കൽ കൂടി കാണിച്ച ഈ കരുതൽ മനോഭാവം! നിരവധി ഹൃദയസ്പർശികളായ ജനങ്ങളുള്ള ഏറ്റവും മികച്ച രാജ്യം! നന്ദി! പ്രധാനമന്ത്രി നരേന്ദ്ര മോദി.” കെവിൻ പീറ്റേഴ്സൺ ട്വീറ്റ് ചെയ്തു.
ഒമിക്രോണിനെതിരെ പോരാടുന്നതിന് കഴിഞ്ഞ ദിവസമാണ് ഇന്ത്യ ആഫ്രിക്കൻ രാജ്യങ്ങൾക്ക് കൊറോണ വാക്സിനുകളും മരുന്നുകളും വാഗ്ദാനം ചെയ്തത് . ആവശ്യമെങ്കിൽ ആഫ്രിക്കൻ രാജ്യങ്ങൾക്ക് ജീവൻരക്ഷാ ഉപകരണങ്ങൾ, ടെസ്റ്റ് കിറ്റുകൾ, കൊറോണ വാക്സിനുകൾ എന്നിവ നൽകുമെന്നാണ് ഇന്ത്യ വ്യക്തമാക്കിയത്.
ആഫ്രിക്കൻ രാജ്യങ്ങളായ മലാവി, എത്യോപ്യ, സാംബിയ, മൊസാംബിക്ക്, ഗിനിയ, ലെസോത്തോ എന്നിവയുൾപ്പെടെ കോവിഷീൽഡ് വാക്സിൻ വിതരണത്തിനായി കോവാക്സ് ഇതുവരെ നൽകിയിട്ടുള്ള എല്ലാ ഓർഡറുകളും സർക്കാർ അംഗീകരിച്ചിട്ടുണ്ട്.
ദക്ഷിണാഫ്രിക്കയിൽ ഒമിക്രോൺ വകഭേദം സ്ഥിരീകരിച്ചതിന് പിന്നാലെ ഭൂരിഭാഗം രാജ്യങ്ങളും ആഫ്രിക്കൻ രാജ്യങ്ങൾക്ക് നിരോധനം ഏർപ്പെടുത്തിയിരുന്നു. നിരോധനങ്ങൾ വന്നതോടെ ഒറ്റപ്പെടുത്തരുതെന്ന് അഭ്യർത്ഥിച്ച് ദക്ഷിണാഫ്രിക്ക രംഗത്തെത്തിയിരുന്നു. ഈ സാഹചര്യത്തിലാണ് ഇന്ത്യയുടെ നിലപാട് അഭിനന്ദനാർഹമാകുന്നത്.
Comments