കാപ്പി മറവിരോഗത്തിന് മറുമരുന്നാകുമോ…? ഗവേഷകരുടെ കണ്ടെത്തലിങ്ങനെ

ഭൂരിഭാഗം പേർക്കും ഇഷ്ടപ്പെട്ട പാനീയമാണ് കാപ്പി. കാപ്പിയുടെ രുചിയും മണവും ഗുണവും ആരെയും ആകർഷിക്കും.കാപ്പിയിൽ അടങ്ങിയിരിക്കുന്ന കഫീനാണ്.കാപ്പിയുടെ ഉത്തേജന ശക്തി. ഇത് ചുരുങ്ങിയ അളവിൽ കഴിക്കുന്നത് ശരീരത്തിന് ഊർജവും ഉന്മേഷവും നൽകുന്നു. മറിച്ച് കൂടുതൽ കഴിച്ചാൽ ശരീരത്തിന് ദോഷം ചെയ്യുമെന്നാണ് വിദഗ്ധരുടെ അഭിപ്രായം. മദ്യത്തേക്കാൾ അപകടകാരിയാണ് കാപ്പിയെന്നും ഹൃദ്രോഗത്തിന് വരെ കാരണമാകുന്നുണ്ടെന്നും ചില പഠനങ്ങൾ കാണിക്കുന്നു.

എന്നാൽ ഓസ്‌ട്രേലിയയിലെ എഡിത്ത് കോവർ യൂണിവേഴ്‌സിറ്റിയിലെ ഗവേഷകർ പറയുന്നതനുസരിച്ച്, ദിവസവും ഒരു ഡോസ് കഫീൻ കഴിക്കുന്നത് നിങ്ങളുടെ ബുദ്ധിപരമായ കഴിവുകളെ മോശമായ അവസ്ഥയിൽ നിന്ന് രക്ഷിക്കുകയും മറവി രോഗം ഉണ്ടാകുന്നത് തടയുകയും ചെയ്യുമെന്നാണ്. 10 വർഷത്തിനിടെ 200 ഓസ്‌ട്രേലിയക്കാരിൽ നിന്ന് ലഭിച്ച വിവരങ്ങളെ അടിസ്ഥാനമാക്കിയാണ് ഗവേഷണം നടത്തിയത്.

ദിവസവും ഒരു നിശ്ചിത അളവിൽ കാപ്പി കുടിക്കുന്ന ആളുകൾ ബുദ്ധിപരമായ പ്രവർത്തനങ്ങളുടെ, പ്രത്യേകിച്ച് ആത്മനിയന്ത്രണം, ആസൂത്രണം, ശ്രദ്ധ എന്നിവയിൽ മികച്ച ഫലങ്ങൾ നൽകുന്നുവെന്ന് പഠനം കണ്ടെത്തി. ഫ്രോണ്ടിയേഴ്‌സ് ഓഫ് ഏജിംഗ് ന്യൂറോ സയൻസ് എന്ന പ്രസിദ്ധീകരണത്തിലാണ് പഠനം പ്രസിദ്ധീകരിച്ചിരിക്കുന്നത്.

തലച്ചോറിൽ അമിലോയിഡ് പ്രോട്ടീന്റെ ശേഖരണമാണ് മറവി രോഗത്തിന്റെ ആരംഭത്തിൽ കാണിക്കുന്നത്. ഇത് ഒരു വ്യക്തിയ്‌ക്ക് പ്രായമാകുമ്പോൾ ആരംഭിക്കുന്നു. എന്നാൽ, പതിവായി കാപ്പി കുടിക്കുന്നത് ഈ പ്രോട്ടീൻ ശേഖരണത്തെ മന്ദഗതിയിലാക്കുന്നു. ഇത് രോഗത്തിന്റെ വളർച്ച തടസ്സപ്പെടുത്താൻ കാരണമാകുന്നു. രോഗലക്ഷണങ്ങളൊന്നും കണ്ടുവരാത്ത ആളുകൾക്ക് ഇത് പ്രത്യേകിച്ചും ഉപയോഗപ്രദമാകും. കാപ്പിയിൽ അടങ്ങിയിരിക്കുന്ന കഫീനാണ് മറവി രോഗത്തെ തടയുന്ന പ്രധാന ഘടകം.

ഒരു കപ്പ് കാപ്പിയുടെ ശരാശരി അളവ് 240 മില്ലി ആണെങ്കിൽ, ഒരു ദിവസം രണ്ട് കപ്പ് കുടിക്കുന്നത് 18 മാസത്തിനുള്ളിൽ ബുദ്ധിപരമായ കഴിവുകൾ കുറയാനുള്ള സാധ്യത 8 ശതമാനം കുറയ്‌ക്കുമെന്ന് ഗവേഷകർ ചൂണ്ടിക്കാട്ടി.തലച്ചോറിലെ അമിലോയിഡ് പ്രോട്ടീന്റെ ശേഖരണം 5 ശതമാനം കുറയുമെന്നും പഠനത്തിൽ വ്യക്തമാക്കുന്നു.

കാപ്പിയും മസ്തിഷ്‌കവും തമ്മിലുള്ള ബന്ധത്തെക്കുറിച്ചുള്ള ചില വിശദാംശങ്ങൾ പഠനത്തിൽ കണ്ടെത്തിയെങ്കിലും, ഇനിയും വിവരങ്ങൾ കണ്ടെത്തേണ്ടതുണ്ട്. ഉദാഹരണത്തിന്, കഫീൻ ഒഴികെ, ഈ ഫലം ലഭിക്കാൻ മറ്റൊരു വസ്തുവുണ്ടോയെന്ന് എന്ന് ഗവേഷകർ ഇതുവരെ കണ്ടെത്തിയിട്ടില്ല.കൂടാതെ കാപ്പി ഉണ്ടാക്കുന്ന പ്രത്യേക ശൈലികൾ അതിനെ വ്യത്യസ്തമായി ബാധിക്കുമോ ഇല്ലയോ എന്നതും ഇതുവരെ കണ്ടെത്തിയിട്ടില്ല. അൽഷിമേഴ്‌സ് രോഗം തുടക്കത്തിൽ തന്നെ ചെറുക്കാൻ, ഒരു ജീവിതശൈലി ഘടകമായി ദിവസവും കാപ്പി കുടിക്കുന്നത് വൈദ്യശാസ്ത്രപരമായി ശുപാർശ ചെയ്യാൻ കഴിയുമോ എന്ന് വിലയിരുത്താനാണ് ഗവേഷക സംഘം പരിശ്രമിക്കുന്നത്.