കാടിനുള്ളിൽ വാഹനത്തിന് നേരെ പാഞ്ഞടുത്ത് കാട്ടാന; ചിതറിയോടി വിനോദസഞ്ചാരികൾ; ഭീതിപ്പെടുത്തി വീഡിയോ

കാടിനുള്ളിലൂടെ യാത്രകൾ നടത്താനും അവിടുത്തെ കാഴ്ചകൾ ആസ്വദിക്കാനും എല്ലാവർക്കും ഇഷ്ടമാണ്. കാടിനുള്ളിലേക്കുള്ള യാത്രയാണെങ്കിൽ എല്ലാവരും കാട്ടുമൃഗങ്ങളെ കാണാനായിരിക്കും പുറത്തേക്ക് നോക്കിയിരിക്കുന്നത്. നാട്ടിലെ ആനയെ കണ്ടാൽ പോലും നോക്കാത്തവർ കാടിനുള്ളിൽ ഒരു ആനയെ കണ്ടുകിട്ടാനായി വലിയ നോട്ടമായിരിക്കും നോക്കുന്നത്. എന്നാൽ ഇങ്ങനെ ആനയെ അടുത്തു കിട്ടിയപ്പോൾ ആവേശം മൂത്ത ചിലർക്ക് പറ്റിയ ഒരു അബദ്ധമാണ് സമൂഹമാദ്ധ്യമങ്ങളിൽ വൈറലാകുന്നത്. ദക്ഷിണാഫ്രിക്കയിലെ ലിംപോപോയിലെ സെലാറ്റി ഗെയിം റിസർവിലാണ് സംഭവം. വന്യമൃഗങ്ങളെ അടുത്തുകാണാനായി കാടിനുള്ളിലെ പാതയിലൂടെയുള്ള സഫാരിയാണ് ഇവിടുത്തെ പ്രധാന ആകർഷണം.

ആനയെ കണ്ട ആവേശത്തിൽ ബഹളം വച്ച സഞ്ചാരികളെ ഒരു ആന പാഞ്ഞെത്തി ആക്രമിക്കുകയായിരുന്നു. ഇവർ സഞ്ചരിച്ച സഫാരി ട്രക്കിന് നേരെയായിരുന്നു ആനയുടെ ആക്രമണം. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്. കാട്ടിനുള്ളിലൂടെ സഞ്ചാരികളുമായി പോവുകയായിരുന്ന വാഹനം കുട്ടിയാനകളുമായി പോകുന്ന ഒരു കാട്ടാനക്കൂട്ടത്തിന് മുന്നിലേക്ക് എത്തി. ആനക്കുട്ടികളെ കണ്ട സന്തോഷത്തിൽ വാഹനത്തിലിരുന്നവർ ഒച്ച വച്ചതോടെ ആനക്കൂട്ടത്തിൽ പിന്നിലായി വന്നു കൊണ്ടിരുന്ന ഒരു ആന സഞ്ചാരികളുടെ സംഘത്തിന് നേരെ പാഞ്ഞടക്കുകയാണ്. വാഹനം തുമ്പിക്കൈ കൊണ്ട് തള്ളുകയും, നശിപ്പിക്കാൻ ശ്രമിക്കുകയും ചെയ്യുന്നുണ്ട്.

ഇതോടെ വാഹനത്തിലുണ്ടായിരുന്നവരെല്ലാം ചിതറിയോടുകയായിരുന്നു. ഇവരുടെ പിന്നിലെത്തിയ വാഹനത്തിലുള്ളവരും ഈ ദൃശ്യങ്ങൾ പകർത്തിയിട്ടുണ്ട്. ഓടിയെത്തിയ കൊമ്പൻ വാഹനം തള്ളിമാറ്റാനും നശിപ്പിക്കാനുമാണ് നോക്കുന്നത്. സഞ്ചാരികളോടൊപ്പം ഇവരുടെ ഗൈഡും ഇറങ്ങിയോടുന്നുണ്ട്. ഭീതിപ്പെടുത്തുന്ന ദൃശ്യങ്ങളെന്ന് പറഞ്ഞുകൊണ്ടാണ് ഇവർ വീഡിയോ പങ്കുവച്ചിരിക്കുന്നത്. തലനാരിഴയ്‌ക്കാണ് രക്ഷപെട്ടതെന്നും ഇവർ പറയുന്നു. സഞ്ചാരികൾ ഓടിമാറിയതോടെ ആനയും പതിയെ പിന്മാറുന്നത് ദൃശ്യങ്ങളിൽ കാണാം.