ലക്നൗ: കള്ളന്മാരയവർക്ക് തന്റെ വാക്കുകൾ ‘കൊള്ളു’മെന്ന് ബോളിവുഡ് താരം കങ്കണ റണാവത്ത്. തന്റെ പ്രസ്താവനകൾ ഒരിക്കലും യഥാർത്ഥ ദേശസ്നേഹികളെ വിഷമിപ്പിക്കില്ല. കാരണം അവർ ആഗ്രഹിക്കുന്നത് തന്നെയാണ് താൻ പറയുന്നതെന്നും ഒരിക്കലും അതിർത്തിയിൽ പ്രതിഷേധിക്കുന്ന സമരക്കാരോട് മാപ്പ് പറഞ്ഞിട്ടില്ലെന്നും കങ്കണ പറഞ്ഞു.
വൃന്ദാവനിലെ താക്കൂർ ബാങ്കെ ബിഹാരി ക്ഷേത്ര ദർശനത്തിന് ശേഷം മാദ്ധ്യമങ്ങളോട് പ്രതികരിക്കുകയായിരുന്നു കങ്കണ റണാവത്ത്. ക്ഷേത്ര ദർശനത്തിന് ശേഷമുള്ള ചിത്രങ്ങളും താരം സമൂഹമാദ്ധ്യമങ്ങളിൽ പോസ്റ്റ് ചെയ്തിട്ടുണ്ട്. ‘കൃഷ്ണന്റെ ജന്മസ്ഥലത്തേയ്ക്കുള്ള വഴിയിൽ…’ എന്ന അടിക്കുറിപ്പോടെയാണ് ചിത്രങ്ങൾ പങ്കുവെച്ചിരിക്കുന്നത്.
ദേശീയത എന്ന വികാരം നിലനിർത്തുന്ന പാർട്ടിയുടെ കൂടെ എന്നും കാണുമെന്നും കങ്കണ പറഞ്ഞു. അപ്രതീക്ഷിതമായുള്ള താരത്തിന്റെ ക്ഷേത്ര ദർശനം അറിഞ്ഞയുടൻ തന്നെ പ്രദേശവാസികളെല്ലാവരും തടിച്ചുകൂടിയിരുന്നു. പോലീസെത്തിയാണ് ജനങ്ങളെ നിയന്ത്രിച്ചത്. ആദ്യമായാണ് കങ്കണ താക്കൂർ ബാങ്കെ ബിഹാരി ക്ഷേത്രത്തിലെത്തുന്നത്.
Comments