കൊച്ചി: സന്തോഷ് ട്രോഫി ഫുട്ബോളിൽ കേരളം ഫൈനൽ റൗണ്ടിൽ. ദക്ഷിണ മേഖലാ ഗ്രൂപ്പ് ബി യോഗ്യതാ റൗണ്ടിലെ അവസാന മത്സരത്തിൽ കേരളം പുതുച്ചേരിയെ തോൽപ്പിച്ചു. ഒന്നിനെതിരേ നാല് ഗോളിനായിരുന്നു കേരളത്തിന്റെ വിജയം. മൂന്നു മത്സരങ്ങളും വിജയിച്ച് ഒമ്പതു പോയിന്റുമായി ഗ്രൂപ്പ് ജേതാക്കളായാണ് കേരളത്തിന്റെ ഫൈനൽ റൗണ്ട് പ്രവേശനം.
സന്തോഷ് ട്രോഫി ഫൈനലിൽ എത്താൻ സമനില മതിയായിരുന്നുവെങ്കിലും വിജയം ലക്ഷ്യംവെച്ചാണ് കേരളം ഇറങ്ങിയത്. 21-ാം മിനിറ്റിൽ പെനാൽറ്റി ലക്ഷ്യത്തിലെത്തിച്ച നിജോ ഗിൽബർട്ടാണ് കേരളത്തിന് ആദ്യ ഗോൾ നേടികൊടുത്തത്. മൂന്നു മിനിറ്റിനുള്ളിൽ അർജുൻ ജയരാജിലൂടെ കേരളം ലീഡ് ഇരട്ടിയാക്കി.
39ാം മിനിറ്റിൽ അൻസൺ സി ആന്റോയിലൂടെ പുതുച്ചേരി ഒരു ഗോൾ തിരിച്ചടിച്ചു. രണ്ടാം പകുതിയിലും കേരളത്തിന്റെ ആക്രമണമാണ് കണ്ടത്. 55-ാം മിനിറ്റിൽ നൗഫൽ മൂന്നാം ഗോൾ നേടി. രണ്ട് മിനിറ്റിനുള്ളിൽ ബുജൈറും ലക്ഷ്യം കണ്ടതോടെ കേരളത്തിന്റെ ഗോൾപട്ടിക പൂർത്തിയായി.
ആദ്യ രണ്ടു മത്സരങ്ങളിൽ ദുർബലരായ ആൻഡമാൻ നിക്കോബറിനേയും ലക്ഷദ്വീപിനേയും കേരളം തകർത്തിരുന്നു.
അൻഡമാനെ എതിരില്ലാതെ ഒമ്പതു ഗോളിനും ലക്ഷദ്വീപിനെ എതിരില്ലാത്ത അഞ്ചു ഗോളിനുമാണ് പരാജയപ്പെടുത്തിയത്. മൂന്നു മത്സരങ്ങളിൽ നിന്നായി 18 ഗോളുകളാണ് കേരളം നേടിയത്.
