ശ്രീനഗർ: ജമ്മുകശ്മീരിലെ ശ്രീനഗറിൽ പോലീസ് വാഹനത്തിന് നേരെ നടന്ന ഭീകരാക്രമണത്തിൽ ഒരു പോലീസുകാരൻ കൂടി വീരമൃത്യു വരിച്ചു. ഇതോടെ ശ്രീനഗർ ഭീകരാക്രമണത്തിൽ വീരമൃത്യു വരിച്ച പോലീസുകാർ മൂന്നായി.
പരിക്കേറ്റ് ചികിത്സയിലായിരുന്ന 12 പോലീസുകാരിൽ ഒരാളാണ് ഇന്ന് പുലർച്ചെ മരണത്തിന് കീഴടങ്ങിയത്. ഇന്നലെ ആക്രമണം നടന്ന സമയത്ത് രണ്ട് പോലീസുകാർ വീരമൃത്യു വരിച്ചിരുന്നു. നിലവിൽ 11 പേരാണ് ചികിത്സയിൽ കഴിയുന്നത്.
തീവ്രവാദ ഗ്രൂപ്പായ ജയ്ഷെ-മുഹമ്മദിന്റെ ഉപസംഘടനയായ കശ്മീർ ടൈഗേഴ്സ് ആക്രമണത്തിന്റെ ഉത്തരവാദിത്വം ഇന്നലെ തന്നെ ഏറ്റെടുത്തിരുന്നു. തിങ്കളാഴ്ച വൈകിട്ട് സെവാനിന് സമീപം ജമ്മു-കശ്മീർ ഹൈവേയിലായിരുന്നു ആക്രമണം. 25 ഉദ്യോഗസ്ഥരുമായാണ് വാഹനം സഞ്ചരിച്ചിരുന്നത്. മൂന്ന് ഭീകരർ ചേർന്ന് വാഹനത്തിന് നേരെ ആക്രമണം നടത്തി. ഇതിൽ ഒരു ഭീകരന് തിരിച്ച് വെടിയേറ്റെങ്കിലും ഇയാൾ ഓടിരക്ഷപ്പെട്ടു.
ഇതിന് പിന്നാലെയാണ് ചൊവ്വാഴ്ച രാവിലെ പൂഞ്ചിൽ ഭീകരരും സുരക്ഷാ സേനയും തമ്മിൽ ഏറ്റുമുട്ടലുണ്ടായത്. സംഭവത്തിൽ ഒരു ഭീകരനെ സൈന്യം വധിച്ചിരുന്നു.
Comments