ന്യൂഡൽഹി: മോഷണ കേസിലെ പ്രതിയെ പിടികൂടാൻ എത്തിയ പോലീസ്, വീട്ടിലെ വളർത്തു നായയെ പിറ്റ്ബുൾ എന്ന ഇനത്തിൽപ്പെട്ട പട്ടിയുമായി പോരിനയച്ചു. ഒടുവിൽ വീട്ടുകാർ ഓമനിച്ചു വളർത്തിയ നായ ദയനീയമായി പരാജയപ്പെട്ട് ചത്തു. സംഭവത്തിന്റെ ദൃശ്യങ്ങൾ പകർത്തിയ വീട്ടുകാർ പോലീസ് ഉദ്യോഗസ്ഥർക്കെതിരെ പരാതിയുമായി രംഗത്തെത്തി.
രോഹിണിയിലെ ബേഗംപൂർ മേഖലയിൽ കവർച്ച നടത്തിയ പ്രതിയെ പിടികൂടാൻ ഡൽഹി പോലീസിന്റെ സംഘം എത്തിയപ്പോഴായിരുന്നു സംഭവം. പോലീസ് ഉദ്യോഗസ്ഥർ തങ്ങളുടെ വീടിനുള്ളിൽ നായ്പ്പോര് നടത്തിയെന്നും അതിനാലാണ് തങ്ങളുടെ വളർത്തുനായ ചത്തതെന്നും വീട്ടുകാർ അവകാശപ്പെടുന്നു.
സംഭവത്തിന്റെ വീഡിയോ കുടുംബാംഗങ്ങളിൽ ഒരാൾ ഫോണിൽ പകർത്തി. നായ്ക്കളുടെ പോരാട്ടം കണ്ട് പോലീസ് ഉദ്യോഗസ്ഥർ കയ്യടിക്കുകയും ആഹ്ലാദിക്കുകയും ചെയ്യുന്നത് ദൃശ്യങ്ങളിൽ കാണാം. കൂടാതെ പോരിന്റെ ആവേശം വർദ്ധിച്ചപ്പോൾ, വളർത്തുനായയെ പോലീസ് മർദ്ദിച്ചെന്നും, നായയുടെ ശരീരത്തിൽ മുറിവുകൾ ഉണ്ടായെന്നും വീട്ടുകാരുടെ പരാതിയിൽ പറയുന്നു. സംഭവത്തിൽ നോർത്തേൺ റേഞ്ച് ജോയിന്റ് പോലീസ് കമ്മീഷണറുടെ നേതൃത്വത്തിൽ അന്വേഷണം നടത്താൻ രോഹിണി മെട്രോപൊളിറ്റൻ മജിസ്ട്രേറ്റ് ഉത്തരവിട്ടു.
Comments