പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമാണ് കടുവ. സിനിമയുടെ ചിത്രീകരണ സമയത്തുള്ള വിശേഷങ്ങൾ പൃഥ്വിരാജ് തന്നെ സമൂഹമാദ്ധ്യമങ്ങളിലൂടെ ആരാധകർക്കായി ഷെയർ ചെയ്യാറുമുണ്ട്. ഷൂട്ടിംഗിനിടെ തന്റെ കയ്യിൽ മുറിവേറ്റ ഒരു ചിത്രമാണ് പൃഥ്വിരാജ് ഫെയ്സ്ബുക്കിലൂടെ പങ്ക് വച്ചിരിക്കുന്നത്.
‘പരിക്കുകളും വേദനകളും! ഒരു ആക്ഷൻ സിനിമ എങ്ങനെയായിരുന്നുവെന്ന് മറന്നു തുടങ്ങിയിരുന്നു. അതിലേക്ക് തിരിച്ചെത്തി. ഇതിനെ ഇഷ്ടപ്പെടുന്നുവെന്നും’ പൃഥ്വിരാജ് കുറിച്ചു. ഫൈറ്റിങ് ത്രൂ ദ പെയിൻ, നൈറ്റ് ഷൂട്ട്, കടുവ തുടങ്ങിയ ഹാഷ് ടാഗുകളും പൃഥ്വിരാജ് ചിത്രത്തോടൊപ്പം പങ്ക് വച്ചിട്ടുണ്ട്. കനൽ കണ്ണനാണ് ചിത്രത്തിന്റെ ആക്ഷൻ ഡയറക്ടർ. കടുവാക്കുന്നേൽ കുറുവാച്ചൻ എന്ന കഥാപാത്രമായാണ് ചിത്രത്തിൽ പൃഥ്വിരാജ് അഭിനയിക്കുന്നത്. വിവേക് ഒബ്റോയിയാണ് ചിത്രത്തിലെ വില്ലൻ കഥാപാത്രത്തെ അവതരിപ്പിക്കുന്നത്.
ലിസ്റ്റിൻ സ്റ്റീഫന്റെ മാജിക് ഫ്രെയിംസും പൃഥ്വിരാജ് പ്രൊഡക്ഷൻസും സംയുക്തമായി നിർമിക്കുന്ന ചിത്രം ഷാജി കൈലാസിന്റെ തിരിച്ചുവരവ് സിനിമ കൂടിയാണ്. എട്ട് വർഷങ്ങൾക്ക് ശേഷം ഷാജി കൈലാസ് സംവിധാനം ചെയ്യുന്ന ചിത്രമാണ് കടുവ. ‘മാസ്റ്റേഴ്സ്’, ‘ലണ്ടൻ ബ്രിഡ്ജ്’ തുടങ്ങിയ ചിത്രങ്ങളുടെ തിരക്കഥാകൃത്തും ആദം സിനിമയുടെ സംവിധായകനുമാണ് സിനിമയുടെ തിരക്കഥ എഴുതിയ ജിനു എബ്രഹാം.
Comments