മുഖാവരണം ധരിച്ചതിന്റെ പേരിൽ വിമാന യാത്ര നിഷേധിച്ചു; യുവാവിന്റെ മാസ്‌ക് കണ്ട് അമ്പരന്ന് യാത്രക്കാർ; ദൃശ്യങ്ങൾ വൈറൽ

ഫ്‌ളോറിഡ: മുഖാവരണം ധരിച്ചതിന്റെ പേരിൽ ഒരു യാത്രക്കാരനെ വിമാനത്തിനുള്ളിൽ നിന്നും പുറത്താക്കിയ ദൃശ്യങ്ങളാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. കൊറോണ കാലത്ത് മാസ്‌ക് ധരിക്കണമെന്ന പ്രോട്ടോക്കോളിൽ വീഴ്ച വരുത്തിയെന്നാണ് വിമാന ജീവനക്കാരുടെ ആരോപണം. എന്നാൽ താൻ മുഖാവരണം ധരിച്ചിട്ടുണ്ടല്ലോയെന്ന യാത്രക്കാരന്റെ വാദം തൽകാലം വിലപ്പോയില്ല. കാരണം ഇയാൾ ധരിച്ചിരുന്നത് സാധാരണയായി കണ്ടുവരുന്ന മാസ്‌ക അല്ല മറിച്ച്, ബിക്കിനി വേഷത്തിന്റെ ഭാഗമായി കണക്കാക്കുന്ന ‘തോങ്’ ആണെന്നതാണ് കാരണം.

LEAVE IT TO THE #FLORIDAMAN! This guy from Cape Coral tried wearing a #thong as a #mask on a United flight in Fort Lauderdale today. He was kicked off the plane. TSA and sheriff were called but passengers remained peaceful. #airtravel #Florida #aviation #travel pic.twitter.com/kUnkXrgTY8

— Channing Frampton (@Channing_TV) December 16, 2021

സ്ത്രീകളുടെ അടിവസ്ത്രത്തിന് സമാനമായ തോങ് മുഖത്ത് അണിഞ്ഞാണ് യാത്രക്കാരൻ വിമാനത്തിനുള്ളിലേക്ക് പ്രവേശിച്ചത്. ഫ്‌ളോറിഡയിലെ യുണൈറ്റഡ് എയർലൈൻസിന്റെ വിമാനത്തിലായിരുന്നു സംഭവം. വിമാനത്തിലെ മറ്റൊരു യാത്രക്കാരൻ ദൃശ്യങ്ങൾ പകർത്തി സമൂഹമാദ്ധ്യമത്തിൽ പങ്കുവെച്ചതോടെയാണ് സംഭവം വൈറലായത്.

തോങ് അണിഞ്ഞതിന്റെ പേരിൽ 38കാരനായ ആദം ജെന്നെ എന്നയാൾക്കാണ് യാത്ര നിരസിച്ചത്. കേപ് കോറൽ സ്വദേശിയാണ് ആദം. തോങ് അണിഞ്ഞ് യാത്ര തുടരാനാണ് ഉദ്ദേശ്യമെങ്കിൽ നടക്കില്ലെന്ന് ജീവനക്കാർ വ്യക്തമാക്കിയിട്ടും തോങ് മാറ്റി മാസ്‌ക് ധരിക്കാൻ ആദം തയ്യാറായില്ല. താൻ ഇതിന് മുമ്പും വിമാനയാത്രയ്‌ക്കിടെ മുഖാവരണമായി തോങ് ഉപയോഗിച്ചിട്ടുണ്ടെന്നും ആരും തന്നെ തടഞ്ഞിട്ടില്ലെന്നുമായിരുന്നു ആദത്തിന്റെ വാദം. എന്നാൽ ഈ വാദം കേൾക്കാൻ വിമാനകമ്പനി തയ്യാറായില്ല. വിമാനത്തിൽ നിന്ന് ആദമിനെ പുറത്താക്കിയതിന് പിന്നാലെ ഇയാൾക്ക് യുണൈറ്റഡ് എയർലൈൻസിൽ യാത്രാവിലക്ക് ഏർപ്പെടുത്തുകയും ചെയ്തു.

ഇതേസമയം തനിക്ക് പിന്തുണ പ്രഖ്യാപിച്ച് ചില യാത്രക്കാർ വിമാനത്തിൽ നിന്ന് ഇറങ്ങിപോന്നതായും ആദം പിന്നീട് പ്രതികരിച്ചു. ചിലവായ വിമാന ടിക്കറ്റ് തുക എയർലൈൻസ് റീഫണ്ട് നൽകിയതായും ആദം പറഞ്ഞു.