ആലപ്പുഴയിലെ രാഷ്ട്രീയ കൊലപാതകങ്ങളിന്മേല് കളക്ടര് വിളിച്ച സര്വ്വകക്ഷിയോഗത്തില് പങ്കെടുക്കില്ലെന്ന് ബിജെപി. യോഗം നടക്കുന്നത് രഞ്ജിത്തിന്റെ സംസ്കാര ചടങ്ങിന്റെ സമയത്ത് ആയതിനാലാണ്, ബിജെപി യോഗത്തില് നിന്ന് പിന്മാറിയത്. അതേസമയം യോഗത്തില് പങ്കെടുക്കില്ലെന്ന് അറിയിച്ചതോടെ യോഗത്തിന്റെ സമയക്രമത്തില് മാറ്റം വരുത്തിയിട്ടുണ്ട്. മൂന്ന് മണിക്ക് നിശ്ചയിച്ചിരുന്ന യോഗം അഞ്ച് മണിയിലേക്കാണ് മാറ്റിയിരിക്കുന്നത്. ഇന്നലെ പോസ്റ്റുമോര്ട്ടം കഴിഞ്ഞ് ഇന്നലെ തന്നെ രഞ്ജിത്തിന്റെ സംസ്കാര ചടങ്ങുകള് നടക്കുമെന്നായിരുന്നു ആദ്യഘട്ടത്തില് തീരുമാനിച്ചിരുന്നത്. എന്നാല് പോസ്റ്റുമോര്ട്ടം നടപടികള് നീണ്ടു പോയതോടെയാണ് സംസ്കാരചടങ്ങുകള് ഇന്ന് വൈകിട്ടത്തേക്ക് തീരുമാനിച്ചത്.
സംസ്കാര ചടങ്ങുകളുടെ സമയം കണക്കാക്കാതെയാണ് കളക്ടര് സര്വ്വകക്ഷിയോഗത്തിന്റെ സമയം തീരുമാനിച്ചത് എന്ന് ബിജെപി നേതാക്കള് ആരോപിച്ചിരുന്നു. സര്വ്വകക്ഷിയോഗം വെറും പ്രഹസനം മാത്രമാണെന്ന് ബിജെപി ദക്ഷിണമേഖലാ പ്രസിഡന്റ് കെ.സോമനും ആരോപിച്ചു. ആത്മാവ് നഷ്ടപ്പെട്ട ഒന്നാണ് സമാധാന യോഗങ്ങള്. യോഗത്തിന് ആത്മാര്ത്ഥത കുറവാണെന്നും അദ്ദേഹം ആരോപിച്ചു.
മന്ത്രി സജി ചെറിയാന്റെ അധ്യക്ഷതയിലാണ് സര്വ്വകക്ഷിയോഗം നടത്താന് തീരുമാനിച്ചിരിക്കുന്നത്. മന്ത്രി പി.പ്രസാദും യോഗത്തില് പങ്കെടുക്കും. കളക്ടറാണ് യോഗം വിളിച്ചിരിക്കുന്നത്. വിവിധ രാഷ്ട്രീയ പാര്ട്ടി നേതാക്കളും യോഗത്തില് പങ്കെടുക്കുമെന്നാണ് വിവരം.
Comments