ന്യൂഡല്‍ഹി: രാജ്യത്ത് കള്ളവോട്ട് തടയുന്നതിനുളള തിരഞ്ഞെടുപ്പ് നിയമഭേദഗതി ബില്‍ രാജ്യസഭ പാസാക്കി. പ്രതിപക്ഷകക്ഷികളുടെ പ്രതിഷേധത്തിനിടെയാണ് ബില്‍ പാസാക്കിയത്. വോട്ടര്‍ പട്ടിക ആധാറുമായി ബന്ധിപ്പിക്കുന്ന ബില്‍നേരത്തെ ലോക്‌സഭ പാസാക്കിയിരുന്നു. ചര്‍ച്ചകള്‍ക്ക് ശേഷം ശബ്ദവോട്ടോടെയാണ് ബില്‍ പാസായത്. നിയമമന്ത്രി കിരണ്‍റിജുജുവാണ് ബില്‍ അവതരിപ്പിച്ചത്.തിരഞ്ഞെടുപ്പു രംഗത്ത് വലിയ പരിഷ്‌കരണം ഉണ്ടാക്കുന്നതാണ് ബില്ലെന്ന് കിരണ്‍ റിജുജു പറഞ്ഞു.
തിരഞ്ഞെടുപ്പില്‍ കള്ളവോട്ടു നടക്കുന്നതായി നേരത്തെ വ്യാപക പരാതി ഉയര്‍ന്നിരുന്നു. എന്നാല്‍ അതുതടയാന്‍ ഫലപ്രദമായ ഒരുമാര്‍ഗവും നിലവിലുണ്ടായിരുന്നില്ല.കള്ളവോട്ട് തടയുന്ന ബില്ലിനെ എതിര്‍ക്കുന്നത് കള്ളത്തരത്തിന് കൂട്ടുനില്‍ക്കുന്നവരാണെന്നും കിരണ്‍ റിജിജു തുറന്നടിച്ചു. ശരിയായ വോട്ടര്‍മാര്‍ ആണെങ്കില്‍ എന്തിനാണ് ബില്ലിനെ എതിര്‍ക്കുന്നതെന്നും തിരഞ്ഞെടുപ്പു രംഗത്ത് വിപ്ലവം സൃഷ്ടിക്കുന്ന ബില്ലിനെ എല്ലാവരും പിന്തുണയ്‌ക്കണമെന്നും റിജുജു ആവശ്യപ്പെട്ടു.
തിരഞ്ഞെടുപ്പ് പട്ടികയില്‍ നിന്ന് വ്യാജവോട്ടര്‍മാരെ പുറത്താക്കുന്നതിന് സഹായകമാകുന്ന ബില്ലിനെ ബിജെപി, ജെഡി(യു)വൈഎസ്ആര്‍സിപി, എഐഎഡിഎംകെ,ബിജെഡി,ഡിഎംസി-എം അംഗങ്ങള്‍ പിന്തുണച്ചപ്പോള്‍ കോണ്‍ഗ്രസും ഇടതുപക്ഷവും ഡിഎംകെയും എന്‍സിപിയും പ്രതിഷേധിച്ച് സഭയില്‍ നിന്നും ഇറങ്ങിപ്പോയി
ബില്‍ സെലക്ട് കമ്മറ്റിക്ക് വിടണമെന്ന പ്രതിപക്ഷ ആവശ്യം ശബ്ദവോട്ടോടെ തള്ളി. ബില്ലുമായി ബന്ധപ്പെട്ട് ചര്‍ച്ച ചെയ്യാന്‍ ഇരുസഭകളിവും അടിയന്തരപ്രമേയ നോട്ടീസിന് കോണ്‍ഗ്രസ് നല്‍കിയിരുന്നു. എന്നാല്‍ എല്ലാകടമ്പളും കടന്ന് ബില്‍ പാസായി. കള്ളവോട്ട് തടയാന്‍ ഉദ്യോഗസ്ഥരെയും തന്റെ വോട്ട് മറ്റൊരാള്‍ ചെയ്യാതിരിക്കാന്‍ വോട്ടര്‍മാരെയും സഹായിക്കുന്നതാണ് ബില്‍.
