ന്യൂഡൽഹി: ഐതിഹാസികമായ ക്രിക്കറ്റ് വിജയത്തിന്റെ കഥപറയുന്ന ബോളിവുഡ് ചിത്രം ’83’ ഡൽഹിയിൽ നികുതി രഹിതമായി പ്രദർശിപ്പിക്കുമെന്ന് പ്രഖ്യാപിച്ച് സർക്കാർ. ഹിന്ദി, തമിഴ്, തെലുങ്കു, കന്നഡ, മലയാളം ഭാഷകളിലായി ഡിസംബർ 24നാണ് സിനിമയുടെ റിലീസ്. ഇന്ത്യയ്ക്ക് ലോകകപ്പ് നേടിക്കൊടുത്ത എക്കാലത്തെയും മികച്ച ഓൾ റൗണ്ടർ കപിൽ ദേവിന്റെ ജീവിതകഥയാണ് 83യിൽ പറയുന്നത്. യഥാർത്ഥ ജീവിതത്തിൽ ദമ്പതികളായ രൺവീർ സിംഗും ദീപിക പദുക്കോണും തന്നെയാണ് 83യിൽ കപിൽ ദേവിനെയും ഭാര്യ റോമി ബാട്ടിയയേയും അവതരിപ്പിക്കുന്നത്.
കപിൽദേവായി രൺവീർ സിംഗ് വേഷമിടുന്ന ചിത്രത്തിന്റെ ട്രെയിലർ കഴിഞ്ഞ ദിവസമാണ് പുറത്തിറങ്ങിയത്. 17 റൺസിന് അഞ്ച് വിക്കറ്റ് നഷ്ടപ്പെട്ട് തോൽവിയിലേക്ക് പോകുകയായിരുന്ന ഇന്ത്യൻ ടീമിനെ കൈപിടിച്ചുയർത്തിയ കപിലിന്റെ ഇന്നിംഗ്സാണ് ട്രെയിലറിൽ പ്രധാനമായും കാണിച്ചിരിക്കുന്നത്. മാച്ചുകൾക്ക് മുൻപ് വിരലിലെണ്ണാവുന്നവർ മാത്രം പങ്കെടുത്ത പത്രസമ്മേളനത്തിൽ ഞങ്ങളിവിടെ വന്നത് കിരീടം നേടാനാണെന്ന് കപിൽ ദേവ് ആത്മവിശ്വാസത്തോടെ പറയുന്ന രംഗവും ട്രെയിലറിലുണ്ട്.
കബീർ ഖാനാണ് ചിത്രം സംവിധാനം ചെയ്യുന്നത്. 1983ലെ ലോകകപ്പ് വിജയമാണ് ചിത്രത്തിന്റെ പ്രധാന പ്രമേയം. നായികയായി അഭിനയിക്കുന്നത് ദീപിക പദുക്കോണാണ് ചിത്രത്തിന്റെ നിർമ്മാതാക്കളിൽ ഒരാൾ. ക്രിക്കറ്റ് പ്രേമികൾ ചിത്രത്തെ ഇരുകയ്യും നീട്ടി സ്വീകരിക്കുമെന്നാണ് പ്രതീക്ഷിക്കപ്പെടുന്നത്.
