കൊച്ചി: മമ്മൂട്ടി ചിത്രം സിബിഐ5ന്റെ ചിത്രീകരണം ആരംഭിച്ചത് മുതൽ ജഗതി ശ്രീകുമാറിന്റെ തിരിച്ചുവരവ് സമൂഹമാദ്ധ്യമങ്ങളിൽ ചർച്ചയായിരുന്നു. സിബിഐ സീരീസിലെ ആദ്യ ചിത്രമായ സിബിഐ ഡയറിക്കുറുപ്പ് മുതലുള്ള എല്ലാ ഭാഗങ്ങളിലും ജഗതി ശ്രീകുമാർ അഭിനയിച്ച വിക്രം സേതുരാമയ്യർക്കൊപ്പം തന്നെ ഉണ്ടായിരുന്നു. വാഹനാപകടത്തിൽ പരിക്കേറ്റ് ചികിത്സയിലും വിശ്രമത്തിലും കഴിയുന്ന ജഗതി സിബിഐ പരമ്പരയിലെ ഏറ്റവും പുതിയ ചിത്രമായ സിബിഐ 5 ൽ അഭിനയിക്കുമോയെന്നായിരുന്നു സിനിമാ ആസ്വാദകർ ഉറ്റുനോക്കിയിരുന്നത്. ചിത്രത്തിൽ ജഗതിയുണ്ടാകുമെന്ന് സോഷ്യൽ മീഡിയയിൽ വലിയരീതിയിൽ പ്രചരിച്ചിരുന്നു.
ജഗതി ഷൂട്ടിംഗിനായി മേക്കപ്പിടുന്ന ചിത്രം സമൂഹമാദ്ധ്യമങ്ങളിലൂടെ പുറത്തുവന്നതോടെയാണ് ഇക്കാര്യത്തിൽ സ്ഥിരീകരണമാകുന്നത്. നടൻ അജു വർഗ്ഗീസ്, ശ്വേതാ മേനോൻ തുടങ്ങി നിരവധി സിനിമാ താരങ്ങളും സിബിഐ5 എന്ന ഹാഷ് ടാഗോടെ ചിത്രം പങ്കുവെച്ചിട്ടുണ്ട്. സിബിഐ 5ന് ഒരുങ്ങുന്ന വിക്രം എന്ന അടിക്കുറിപ്പോടെയാണ് ചിത്രം പ്രചരിക്കുന്നത്.
മമ്മൂട്ടിയുടെ ആവശ്യപ്രകാരമാണ് ജഗതി ചിത്രത്തിലേക്ക് തിരികെയെത്തുന്നതെന്ന വാർത്തകൾ നേരത്തെ പുറത്തുവന്നിരുന്നു. സിബിഐ സീരീസിലെ ചിത്രത്തിൽ ജഗതി ശ്രീകുമാർ വേണമെന്നും ഏതെങ്കിലും ഒരു രംഗത്തിൽ ജഗതിയുടെ സാന്നിദ്ധ്യം ഉണ്ടാകണമെന്നുമാണ് മമ്മൂട്ടി ആവശ്യപ്പെട്ടത്. വാഹനാപകടത്തിൽ പരിക്കേറ്റതിന് ശേഷം വർഷങ്ങളായി ജഗതി ശ്രീകുമാർ അഭിനയരംഗത്തില്ല.
സിബിഐ സീരീസിലെ ജഗതിയുടെ കഥാപാത്രം ഒഴിവാക്കാൻ സാധിക്കാത്ത ഒന്നാണ്. ഒരേ സമയം നർമ്മവും സീരിയസ് സംഭാഷണങ്ങളും ജഗതി കൈകാര്യം ചെയ്യുന്നുണ്ട്. സേതുരാമയ്യർ സിബിഐയായി മമ്മൂട്ടി വീണ്ടുമെത്തുമ്പോൾ ടീമിലെ ജഗതിയുടെ കഥാപാത്രമായ വിക്രമിന്റെ വിടവ് ഉണ്ടാകും. കഴിഞ്ഞ മാസം 29നാണ് ചിത്രത്തിന്റെ ഷൂട്ടിംഗ് ആരംഭിച്ചത്. മമ്മൂട്ടിയും ടീമിൽ ജോയിൻ ചെയ്ത് കഴിഞ്ഞു.
സ്വർഗചിത്ര അപ്പച്ചനാണ് ചിത്രം നിർമ്മിക്കുന്നത്. സിബിഐയുടെ ഐക്കോണിക് തീം മ്യൂസിക് ഒരുക്കുന്നത് ജെക്സ് ബിജോയ് ആണ്. 1988ൽ പുറത്തിറങ്ങിയ ഒരു സിബിഐ ഡയറിക്കുറിപ്പ് എന്ന ചിത്രത്തിലൂടെയാണ് സിബിഐ സീരീസ് ആരംഭിച്ചത്. തുടർന്ന് ജാഗ്രത, സേതുരാമയ്യർ സിബിഐ, നേരറിയാൻ സിബിഐ സിനിമകളും ഈ സീരീസിലേതായി പുറത്തിറങ്ങി.
