ജയ്പൂർ: രാജസ്ഥാനിലെ വ്യോമസേന വിമാനാപകടത്തിൽ മരിച്ചത് വിങ് കമാൻഡർ ഹർഷിത് സിൻഹയെന്ന് സ്ഥിരീകരണം. ജയ്സൽമീറിന് സമീപം വിമാനം തകർന്നു വീണാണ് പൈലറ്റായിരുന്ന ഹർഷിത് സിൻഹ മരിച്ചതെന്ന് ഇന്ത്യൻ വ്യോമസേന വ്യക്തമാക്കി.
മിഗ് 21 എന്ന യുദ്ധവിമാനമാണ് തകർന്നു വീണത്. കുനൂർ അപകടത്തിന്റെ നടുക്കത്തിൽ നിന്നും രാജ്യം മോചിതമാകുന്നതിന് മുമ്പാണ് അപകടം. ഗംഗ ഗ്രാമത്തിന് സമീപമുള്ള ഡിഎൻപി ഏരിയയിൽ പരിശീലന പറക്കലിനിടെയാണ് അപകടമുണ്ടായതെന്ന് റിപ്പോർട്ടുകൾ പറയുന്നു.
വെള്ളിയാഴ്ച രാത്രി 8.30ഓടെയാണ് അപകടമുണ്ടായത്. തിരച്ചിലിനിടെ പൈലറ്റിനെ രക്ഷാപ്രവർത്തകർ കണ്ടെത്തിയെങ്കിലും തീപിടുത്തത്തിൽ ഗുരുതരമായി പൊള്ളലേറ്റതിനാൽ ജീവൻ നഷ്ടപ്പെട്ടിരുന്നു.
മോശം കാലാവസ്ഥയോ സാങ്കേതിക തകരാറോ ആകാം അപകടത്തിന് കാരണമെന്നാണ് പ്രാഥമിക നിഗമനം. സംഭവത്തിൽ വ്യോമസേന അന്വേഷണം പ്രഖ്യാപിച്ചു.
