കൊല്‍ക്കത്ത: മിഷനറിസ് ഓഫ് ചാരിറ്റിയുടെ ബാങ്ക് അക്കണ്ട് ലൈസന്‍സ് അയോഗ്യതകാരണം പുതുക്കി നല്‍കിയില്ലെന്ന വിവാദത്തിന് എണ്ണപകരുകയാണ് പശ്ചിമബംഗാള്‍ മുഖ്യമന്ത്രി മമത ബാനര്‍ജിയെന്ന് ബിജെപി സംസ്ഥാന അദ്ധ്യക്ഷന്‍ സുകാന്ദ മജുംദാര്‍. രാജ്യത്ത് വര്‍ഗീയത പടര്‍ത്തുന്ന കാര്യത്തില്‍ അസാദുദ്ദീന്‍ ഉവൈസിയേക്കാള്‍ ഒരുപടി മുന്നിലാണ് മമതയെന്നായിരുന്നു അദ്ദഹത്തിന്റെ വാക്കുകള്‍.
വര്‍ഗീയത പടര്‍ത്തുന്നതിനായി മുല്ലമാര്‍ക്കും മതപണ്ഡിതര്‍ക്കും പണം കൊടുത്ത മമതയ്‌ക്ക് ഇപ്പോള്‍ മമത ക്രിസ്ത്യന്‍ സമൂഹത്തോടാണെന്നും മുസ്ലീങ്ങളോട് കാണിച്ച അതെ മനോഭാവം ഇപ്പോള്‍ ക്രിസ്ത്യന്‍ സമൂഹത്തോടും കാണിക്കുകയാണെന്നും അദ്ദേഹം പറഞ്ഞു. എല്ലാകാര്യത്തിലും മതപരമായ കോണിലേക്ക് കേന്ദ്രസര്‍ക്കാരിനെ വലിച്ചിഴയ്‌ക്കുക മമതയ്‌ക്ക് ഒരു ഹോബിയാണെന്നും അദ്ദേഹം തുറന്നടിച്ചു.
മമത രാജ്യത്ത് അസഹിഷ്ണുതയും അസ്വസ്ഥതയും പടര്‍ത്തുകയാണ്. രാജ്യത്ത് പ്രശ്നം സൃഷ്ടിക്കാന്‍ ആഗ്രഹിക്കുന്ന അയല്‍പക്കത്തിന് ഗുണകരമാകുന്നരീതിയില്‍ പ്രശ്നങ്ങളില്‍ മമത എണ്ണപകരുകയാണെന്നും മമത ഇത്തരം സ്വഭാവം ഒഴിവാക്കേണ്ടതുണ്ടെന്നും അദ്ദേഹം പറഞ്ഞു.
മിഷനറീസ് ചാരിറ്റിയുടെ ലൈസന്‍സ് പുതുക്കി നല്‍കാത്ത കേന്ദ്ര നടപടിയില്‍ കേന്ദ്രത്തെ മതത്തെ മുന്‍നിര്‍ത്തി വിമര്‍ശിച്ചിരുന്നു.
ക്രിസ്മസ് ദിനത്തില്‍ കേട്ടവാര്‍ത്ത ഞെട്ടിപ്പിക്കുന്നതായിരുന്നു. മിഷനറീസ് ഓഫ് ചാരിറ്റിയുടെ അക്കൗണ്ട് മരവിപ്പിച്ചതോടെ 22,000 രോഗികള്‍ക്ക് മരുന്നും ഭക്ഷണവും ലഭിക്കാതെ പുറത്തുപോവേണ്ടി വന്നുവെന്നും അവര്‍ ട്വീറ്റ് ചെയ്തു. അതെ സമയം മിഷനറീസ് ഓഫ് ചാരിറ്റിയുടെ ഫോറിന്‍ കോണ്‍ട്രിബ്യൂഷന്‍ റഗുലേഷന്‍ ആക്ട് റദ്ദു ചെയ്യുകയോ തടഞ്ഞുവയ്‌ക്കുകയോ ചെയ്തിട്ടില്ലെന്ന് വ്യക്തമാക്കി മിഷനറീസ് ഓഫ് ചാരിറ്റി തന്നെ രംഗത്ത് എത്തിയിരുന്നു. ബാങ്ക് അക്കണ്ട് മരവിപ്പിച്ചതായി ഒരു ഉത്തരവും കേന്ദ്രം തങ്ങള്‍ക്ക് നല്‍കിയിട്ടില്ലെന്ന് ബന്ധപ്പെട്ടവര്‍ അറിയിച്ചു.
കേന്ദ്രം മിഷനറീസ് ഓഫ് ചാരിറ്റിയുടെ അക്കൗണ്ട് മരവിപ്പിച്ചിട്ടില്ലെന്നും ലൈസന്‍സ് പുതുക്കി നല്‍കാനുള്ള യോഗ്യത വ്യവസ്ഥകള്‍ പാലിക്കാത്തതിനാല്‍ അപേക്ഷ നിരസിക്കുകയാണ് ഉണ്ടായതെന്നും കേന്ദ്രആഭ്യന്തരമന്ത്രാലയം വ്യക്തമാക്കിയിരുന്നു.
