ന്യൂയോർക്ക്: ‘ദേ പോയി, ദാ വന്നു’ എന്നു പറയുന്നത് പോലെ വിപണിയിലെത്തിയ അതേ വേഗത്തിൽ ഉൽപാദനം നിർത്തിയ പെപ്സിക്കോ കമ്പനിയുടെ പാനീയമായിരുന്നു ക്രിസ്റ്റൽ പെപ്സി. 1990കളിൽ ആദ്യമായെത്തിയ ക്രിസ്റ്റൽ പെപ്സി മൂന്ന് പതിറ്റാണ്ടുകൾ പിന്നിടുമ്പോൾ ആരാധകർക്കിടയിലേക്ക് വീണ്ടുമെത്തുകയാണ്.
എന്നാൽ ഇത് വിപണിയിൽ നിന്നും ഉപഭോക്താക്കൾക്ക് വാങ്ങാനാകില്ലെന്നതാണ് പ്രത്യേകത. അതായത് കമ്പനി അധികൃതർ ഒരു കോൺടസ്റ്റ് വച്ചിരിക്കുകയാണ്. അതിൽ വിജയിക്കുന്നവർക്കാണ് ക്രിസ്റ്റൽ പെപ്സി ലഭിക്കുക.
ക്രിസ്റ്റൽ പെപ്സി ലഭിക്കാൻ നിങ്ങൾ ചെയ്യേണ്ടത് ഇത്രമാത്രമാണെന്നാണ് കമ്പനി പറയുന്നത്. ട്വിറ്ററിൽ നിങ്ങളുടെ ഒരു ഫോട്ടോ അപ്ലോഡ് ചെയ്യുക. ആ ഫോട്ടോ 1990കളിൽ എടുത്തതായിരിക്കണമെന്നതാണ് നിബന്ധന. ട്വിറ്ററിൽ #ShowUsYour90 എന്ന ടാഗിലാണ് ഫോട്ടോ അപ്ലോഡ് ചെയ്യേണ്ടത്. ഇത്തരത്തിൽ പോസ്റ്റ് ചെയ്യുന്ന ഫോട്ടോകളിൽ 300 എണ്ണം കമ്പനി തിരഞ്ഞെടുക്കും. അവർക്കാണ് ക്രിസ്റ്റൽ പെപ്സി ലഭിക്കുക. പെപ്സിയുടെ 20 ഔൺസ് ബോട്ടിലാണ് സമ്മാനം.
1992ലാണ് ആദ്യമായി ക്രിസ്റ്റൽ പെപ്സി പുറത്തിറങ്ങുന്നത്. എന്നാൽ 1994ന്റെ തുടക്കത്തിൽ തന്നെ അവ വിപണിയിൽ നിന്നും പിൻവലിച്ചു. പെപ്സിക്കോ കമ്പനിയിൽ അന്നത്തെ എക്സിക്യൂട്ടീവ് ആയിരുന്ന ഡേവിഡ് നൊവാക്ക് ആയിരുന്നു ക്രിസ്റ്റൽ പെപ്സിയുടെ ഉപജ്ഞാതാവ്. അദ്ദേഹത്തിനുണ്ടായ ഏറ്റവും മികച്ച ഐഡിയ ആയിരുന്നു ക്രിസ്റ്റൽ പെപ്സിയെന്നും പക്ഷേ ഏറ്റവും മോശമായി നടപ്പിലാക്കിയ പദ്ധതിയായിരുന്നുവെന്നും അദ്ദേഹം പ്രതികരിച്ചിട്ടുണ്ട്. ക്ലിയർ സോഡ എന്ന പേരിലും അറിയപ്പെട്ടിരുന്ന ക്രിസ്റ്റൽ പെപ്സി വിപണയിൽ വിജയകരമായിരുന്നില്ലെന്ന് വിലയിരുത്തിയാണ് ഉൽപാദനം നിർത്തലാക്കിയത് എങ്കിലും ആരാധകരെ സൃഷ്ടിച്ച പാനീയമായിരുന്നുവെന്നാണ് വിവരം.
Comments