കൊച്ചി: ഇടപ്പള്ളിയിൽ മോഷണ ശ്രമം തടയുന്നതിനിടെ എഎസ്ഐയെ കുത്തി പരിക്കേൽപ്പിച്ച പ്രതിയെ പോലീസ് പിടികൂടുന്നതിന്റെ ദൃശ്യങ്ങൾ പുറത്ത്. ആക്രമണം നടത്തിയ പ്രതിയെ പോലീസ് ഉദ്യോഗസ്ഥർ ഓടിച്ചിട്ട് പിടികൂടുന്ന ദൃശ്യങ്ങളാണ് പുറത്തുവന്നിരിക്കുന്നത്.
എളമക്കര സ്റ്റേഷനിലെ എഎസ്ഐ ഗിരീഷ് കുമാറിനായിരുന്നു ആക്രമണത്തെ തുടർന്ന് കൈത്തണ്ടയിൽ കുത്തേറ്റത്. കളമശേരിയിൽ നിന്ന് ബൈക്ക് മോഷ്ടിക്കുന്നത് ശ്രദ്ധയിൽപ്പെട്ട പോലീസ് പ്രതിയെ പിടികൂടുന്നതിനിടെ ആയിരുന്നു ആക്രമണം. എച്ച്എംടി കോളനിയിലെ ബിച്ചു എന്ന യുവാവാണ് പ്രതിയെന്ന് പോലീസ് അറിയിച്ചു.
ഇടപ്പള്ളി മെട്രോ സ്റ്റേഷന് സമീപം ബുധനാഴ്ച പുലർച്ചെ ആയിരുന്നു സംഭവം. പരിക്കേറ്റ എഎസ്ഐ ഗിരീഷ് കുമാർ ആശുപത്രിയിൽ ചികിത്സയിലാണ്.
