മരങ്ങളുടെ പച്ചപ്പിനിടയിൽ അതിമനോഹരമായി കാണപ്പെടുന്ന ഒരു തടാകം. നല്ല സ്ട്രോബറിയുടെ നിറം. സ്ട്രോബറി ഷേയ്ക്ക് ആണോയെന്ന് പോലും തോന്നിപ്പോകും. ഇളം പിങ്ക് നിറമാണ് ഹില്ലിയർ തടാകത്തിന്. ഓസ്ട്രേലിയൻ തീരത്ത് പസഫിക് മഹാസമുദ്രത്തിന് സമീപമായാണ് ഹില്ലിയർ തടാകം സ്ഥിതിചെയ്യുന്നത്. നീല നിറത്തിലുള്ള പസഫിക്കിന് തൊട്ടടുത്തായി കാണുന്ന ഹില്ലിയർ തടാകം എങ്ങിനെ പിങ്ക് നിറമായി എന്നത് ഏവർക്കും അത്ഭുതമാണ്.
ഓസ്ട്രേലിയലിലെ പടിഞ്ഞാറൻ തീരത്തെ മിഡിൽ ഐലൻറ് മേഖലയിലാണ് ഹില്ലിയർ തടാകം സ്ഥിതിചെയ്യുന്നത്. 600 മീറ്റർ നീളവും 250 മീറ്റർ വീതിയുമുള്ള ഈ കൊച്ചു തടാകമാണ് ഇത്. 1802 ൽ ബ്രിട്ടീഷ് സമുദ്രപര്യവേഷകൻ ആയ മാത്യു ഫ്ളിൻഡേഴ്സ് ആണ് ഹില്ലിയർ ലേക്ക് ആദ്യമായി കണ്ടുപിടിച്ചത്. തടാകത്തിന് പേര് നൽകിയതും അദ്ദേഹം തന്നെ. സമുദ്രപര്യവേഷണത്തിനിടെ മരണമടഞ്ഞ ആത്മസുഹൃത്ത് വില്യം ഹില്ലിയറുടെ ഓർമ്മയ്ക്കായാണ് അദ്ദേഹം തടാകത്തിന് ഹില്ലിയർ തടാകം എന്ന പേര് നൽകിയത്.
പസഫിക് സമുദ്രം നീല നിറത്തിൽ കാണപ്പെടുമ്പോഴും ഹില്ലിയർ തടാകത്തിന് എന്തുകൊണ്ടു പിങ്ക് നിറം വന്നു എന്നത് സംബന്ധിച്ച പഠനങ്ങളിൽ അന്ന് മുതൽ തന്നെ ഗവേഷകർ ഏർപ്പെട്ടിരുന്നു. തടാകത്തിലെ ലവണാംശമാണ് ഈ നിറ വ്യത്യാസത്തിന് കാരണം എന്നായിരുന്നു അവരുടെ കണ്ടെത്തൽ. ലവണാംശം ജലത്തിലെ സൂക്ഷ്മാണുക്കളുമായി ചേരുന്നതിന്റെ ഫലമാണ് വെള്ളത്തിന്റെ ഈ പിങ്ക് നിറം.
തടാകത്തിൽ കാണപ്പെടുന്ന ഡുണാലിയല്ല സലൈന എന്ന മൈക്രോ ആൽഗകളാണ് വെള്ളത്തിലെ പിങ്ക് നിറത്തിന്റെ കാരണക്കാർ. ഉയർന്ന സാന്ദ്രതയിലുള്ള ലവണാംശം സ്വാംശീകരിക്കാൻ കഴിവുള്ള ഇവ ഊർജ്ജം ഉൽപ്പാദിപ്പിക്കാൻ ഉപയോഗിക്കുന്നത് അന്തരീക്ഷത്തിലെ ചുവപ്പ്, ഓറഞ്ച് എന്നീ നിറങ്ങളാണ്. ഈ നിറങ്ങൾ പ്രതിഫലിക്കുന്നതാണ് പിങ്ക് നിറത്തിന് കാരണമാകുന്നത്.
ഉപ്പുവെള്ളമാണ് തടാകത്തിലേത്. കുടിക്കാൻ യോഗ്യമല്ലെങ്കിലും നദിയിൽ ഇറങ്ങുന്നതുകൊണ്ട് ആരോഗ്യപ്രശ്നങ്ങൾ ഇല്ലെന്നാണ് വിദഗ്ധർ പറയുന്നത്. എത്തിപ്പെടാൻ അൽപ്പം പ്രയാസമാണെന്നതിനാൽ ഇവിടേക്ക് എത്തുന്ന വിനോദസഞ്ചാരികളുടെ എണ്ണം താരതമ്യേന കുറവാണ്. അടുത്തു നിന്ന് കാണുന്നതിനേക്കാൾ ഹെലികോപ്റ്ററിൽ ഇരുന്ന് ഹില്ലിയർ ലേക്ക് കാണാനാണ് കൂടുതൽ പേർക്കും താത്പര്യം. കാരണം ദൂരെ നിന്ന് കാണുമ്പോഴുള്ള തടാകത്തിന്റെ മനോഹാരിതയാണ്.
