ഭുവനേശ്വർ: ഒഡീഷയിലെ ഭിതർകനിക ദേശീയോദ്ധ്യാനത്തിൽ വെള്ള നിറമുള്ള മുതലയെ കണ്ടെത്തി. ആൽബിനോ സാൾട്ട് വാട്ടർ എന്ന ഇനത്തിൽപ്പെടുന്ന അപൂർവയിനം മുതല വർഗമാണിത്. ഇവയെ ദേശീയോദ്ധ്യാനത്തിലുള്ള ദംഗമാൽ എന്ന ഭാഗത്താണ് കണ്ടെത്തിയതെന്ന് ഫോറസ്റ്റ് ഡിവിഷണൽ ഓഫീസർ ജെ.ഡി പതി അറിയിച്ചു.
അപൂർവമായി കണ്ടുവരുന്ന വെള്ള മുതലയ്ക്ക് വനപാലകർ ‘ശ്വേത’ എന്നാണ് പേരിട്ടത്. ആകെ മൂന്ന് ആൽബിനോ മുതലകളാണ് ഭിതർകനികയിൽ ഇപ്പോഴുള്ളത്. വർഷങ്ങളുടെ വളർച്ചയ്ക്ക് ശേഷമാണ് ആൽബീനോ മുതലകളുടെ വെള്ള നിറം പൂർണമാകുകയെന്നും അധികൃതർ വ്യക്തമാക്കി.
ഇത്തരം വെളുത്ത മുതലകൾ അപൂർവമാണെങ്കിലും ഭിതർകനികയിൽ ഇവയെ മുമ്പും കണ്ടെത്തിയിട്ടുണ്ട്. കഴിഞ്ഞ വർഷത്തെ സെൻസസ് പ്രകാരം 15 ആൽബിനോ മുതലകൾ ഉൾപ്പടെ 1,768 മുതലകളെ നദികളിലും മറ്റ് ജലാശയങ്ങളിലുമായി കണ്ടെത്തി. മുതല സംരക്ഷണത്തിന്റെ ഭാഗമായി 1975ൽ വനംവകുപ്പ് വിരിയിച്ച് വളർത്തിയ 40 വയസുള്ള ‘ഗൗരി’യാണ് ഭിതർകനികയിൽ ആദ്യമായി കണ്ടെത്തിയ ആൽബിനോ മുതല.
