ന്യൂഡൽഹി: കൊറോണ സാഹചര്യം വിലയിരുത്താൻ സംസ്ഥാന ആരോഗ്യമന്ത്രിമാരുമായി കേന്ദ്ര ആരോഗ്യമന്ത്രി മൻസുഖ് മാണ്ഡവ്യ നാളെ ചർച്ച നടത്തും. സംസ്ഥാനങ്ങളിൽ കൊറോണ കേസുകൾ കുതിച്ചുയരുന്നത് കണക്കിലെടുത്താണ് അടിയന്തര യോഗം വിളിച്ചത്. നാളെ രാവിലെ 11 മണിക്കാണ് യോഗം സംഘടിപ്പിച്ചിരിക്കുന്നത്.
അതേസമയം, പ്രധാനമന്ത്രി നരേന്ദ്ര മോദി വിളിച്ച കൊറോണ അവലോകന യോഗം ആരംഭിച്ചു. രാജ്യത്ത് കൊറോണ ബാധിച്ച് ചികിത്സയിൽ കഴിയുന്നവരുടെ എണ്ണം ആറ് ലക്ഷത്തിനടുത്തെത്തിയ സാഹചര്യത്തിലാണ് യോഗം ചേർന്നത്. സംസ്ഥാനങ്ങളിലെ കൊറോണ സാഹചര്യവും പ്രതിരോധത്തിനായുള്ള ക്രമീകരണങ്ങളും വിലയിരുത്തും. കേന്ദ്ര ആരോഗ്യമന്ത്രി, ആഭ്യന്തരമന്ത്രി അമിത് ഷാ എന്നിവർ യോഗത്തിൽ പങ്കെടുത്തു.
