കൊറോണ ബാധിച്ച ദിവസം പരിശോധന നടത്തിയത് കൊണ്ട് പ്രയോജനമില്ലെന്ന് ഐസിഎംആർ. കൊറോണ ബാധിച്ച് മൂന്നാം ദിവസം മുതൽ മാത്രമേ ആന്റിജൻ പരിശോധനയിലൂടെ വൈറസ് ബാധ തിരിച്ചറിയാൻ സാധിക്കൂ. അതേസമയം ആർടിപിസിആർ പരിശോധനയിൽ രണ്ടാമത്തെ ദിവസം മുതൽ തന്നെ വൈറസ് ബാധ തിരിച്ചറിയാൻ സാധിക്കും.
ആന്റിജൻ പരിശോധനയിൽ രോഗം ബാധിച്ച് എട്ടാം ദിവസം വരെ മാത്രമേ പോസിറ്റീവായി കാണിക്കുകയുള്ളു. എന്നാൽ ആർടിപിസിആർ പരിശോധനയിൽ 20 ദിവസം വരെ പോസിറ്റീവായി കാണിക്കാനുള്ള സാധ്യതയുണ്ടെന്നും ഐസിഎംആർ ഡയറക്ടർ ജനറൽ ഡോ.ബൽറാം ഭാർഗവ് പറഞ്ഞു. വൈറസിലെ ചില എൻആർഎ ഭാഗം തുടർന്നും സാമ്പിളിൽ കാണിക്കുന്നത് കൊണ്ടാണിത്.
കഴിഞ്ഞ ദിവസം കൊറോണ പരിശോധനാ മാർഗരേഖ ഐസിഎംആർ പുതുക്കിയിരുന്നു. ഇത് പ്രകാരം കൊറോണ രോഗിയുമായി സമ്പർക്കം പുലർത്തിയ എല്ലാവരും പരിശോധന നടത്തേണ്ടതില്ല. പകരം പ്രായമായവരും അനുബന്ധ രോഗമുള്ളവരും മാത്രം പരിശോധന നടത്തിയാൽ മതി. ചുമ, പനി, തൊണ്ടവേദന, രുചിയോ മണമോ നഷ്ടപ്പെടൽ, ശ്വാസതടസം തുടങ്ങിയവ ഉള്ളവരും പരിശോധന നടത്തണം.
Comments