ലോകം വീണ്ടും കൊറോണയുടെ പിടിയിലായി കഴിഞ്ഞു. നിരവധി രാജ്യങ്ങളിൽ പ്രതിദിനം മൂന്ന് ലക്ഷത്തോളം കൊറോണ കേസുകളാണ് സ്ഥിരീകരിക്കുന്നത് . ഒമിക്രോണിന്റെ ആവിർഭാവം ഇന്ത്യയുൾപ്പെടെയുള്ള രാജ്യങ്ങളെ വലിയ തോതിൽ ബാധിച്ച് വരികയാണ്. ഈ സാഹചര്യത്തിലാണ് വളരെ വിചിത്രമായ പഠന വിവരങ്ങൾ പുറത്തുവരുന്നത്.
മനുഷ്യ കോശങ്ങളിലേക്ക് വൈറസ് കടന്നുകയറുന്നതിനെ പ്രതിരോധിക്കാൻ കഴിവുള്ള ചില രാസ സാന്നിധ്യങ്ങൾ കഞ്ചാവ് ചെടിയിലുണ്ടെന്നാണ് ഗവേഷണ റിപ്പോർട്ട്. കഞ്ചാവിൽ കണ്ടെത്തിയ രണ്ട് ഘടകങ്ങളാണ് ഇത്തരത്തിൽ വൈറസിൽ നിന്നും പ്രതിരോധിക്കാൻ സഹായിക്കുക എന്നാണ് കണ്ടെത്തൽ. അതേസമയം ഈ ഘടകങ്ങൾ കഞ്ചാവിലുണ്ടെന്ന് കരുതി കഞ്ചാവ് ചുരുട്ടി പുകച്ചാൽ പ്രതിരോധ ശക്തി കൈവരിക്കാൻ സാധിക്കില്ലെന്ന് പഠന റിപ്പോർട്ടിൽ വ്യക്തമാക്കുന്നു.
അമേരിക്കയിലെ ഒറിഗോൺ സ്റ്റേറ്റ് സർവകലാശാലയിലെ ഫാർമസി കോളേജിൽ നടത്തിയ ഗവേഷണത്തിലാണ് കണ്ടെത്തൽ. പ്രകൃതി ദത്തമായ ഉൽപ്പന്നങ്ങളെക്കുറിച്ച് പ്രതിപാദിക്കുന്ന സർവകലാശാലയുടെ പുതിയ ജേണലിലാണ് പഠന റിപ്പോർട്ട് പ്രസിദ്ധീകരിച്ചിരിക്കുന്നത്.
കഞ്ചാവിലെ സിബിജിഎ, സിബിഡിഎ എന്നീ രണ്ട് ഘടകങ്ങളാണ് കൊറോണ വൈറസിൽ നിന്നും പ്രതിരോധിക്കാൻ സഹായിക്കുന്നതായി കണ്ടെത്തിയിട്ടുള്ളത്. കാന്നബിഗറോളിക് ആസിഡും കാന്നബിഡിയോളിക് ആസിഡുമാണിത്. വൈറസ് മനുഷ്യകോശത്തിലേക്ക് പ്രവേശിക്കുന്നതിനെ ഒരു പരിധി വരെ തടയാൻ ഈ രണ്ട് ഘടകങ്ങൾക്കും സാധിക്കുമെന്ന് പഠനം നടത്തിയ ഗവേഷകരായ റിച്ചാർഡ് വാൻ ബ്രീമെനും സംഘവും വ്യക്തമാക്കുന്നു.
