ലോകത്തിലെ ഏറ്റവും വലുതും, വിലപിടിപ്പുള്ളതുമായ ബ്ലാക്ക് ഡയമണ്ട് ‘ദ എനിഗ്മ’യുടെ പ്രദർശനമാരംഭിച്ചു. അപൂർവങ്ങളിൽ അപൂർവമായ ഈ ബ്ലാക്ക് ഡയമണ്ട് നിലവിൽ ദുബായിലാണ് പ്രദർശിപ്പിച്ചിട്ടുള്ളത്. ഏതാനും ആഴ്ചകൾക്കുള്ളിൽ ലണ്ടനിലും ലോസ് ആഞ്ചലസിലേക്കുമെത്തുമെന്ന് അധികൃതർ വ്യക്തമാക്കി. 555.55 കാരറ്റിന്റെ ബ്ലാക്ക് ഡയമണ്ടാണിത്.
എനിഗ്മ ഭൂമിക്ക് പുറത്തുനിന്ന് എത്തിച്ചേർന്നതാണെന്നാണ് വിലിയിരുത്തൽ. ഉൽക്കകൾ തമ്മിൽ കൂട്ടിയിടിച്ചോ, ഛിന്നഗ്രഹങ്ങളുമായുണ്ടായ കൂട്ടിയിടി മൂലമോ ഭൂമിയിൽ പതിച്ചതാകാമെന്നാണ് നിഗമനം. അത്യപൂർവമായ ബ്ലാക്ക് ഡയമണ്ട് അഥവ കറുത്ത വജ്രമാണിതെന്ന് ഗവേഷകർ ചൂണ്ടിക്കാട്ടുന്നു. ഏകദേശം 6.8 ദശലക്ഷം ഡോളറിന് ഇവ വിറ്റുപോകുമെന്നാണ് കരുതുന്നത്. അതായത് ഇന്ത്യൻ രൂപ ഏകദേശം 55 കോടി 77 ലക്ഷം രൂപയ്ക്ക്. ഫെബ്രുവരിയിലാണ് എനിഗ്മയുടെ ലണ്ടൻ എക്സിബിഷൻ. ലോസ് ആഞ്ചലസിൽ പ്രദർശനത്തിന് വെച്ച ശേഷമാണ് ലണ്ടനിലേക്ക് എത്തിക്കുക.
ബ്ലാക്ക് ഡയമണ്ടുകൾ കാർബൊണാഡോ വജ്രങ്ങൾ എന്നും അറിയപ്പെടാറുണ്ട്. ഇവ ഏകദേശം 2.6 ബില്യൺ വർഷങ്ങൾക്ക് മുമ്പ് ഭൂമിയിലെത്തിപ്പെട്ടുവെന്നാണ് പറയപ്പെടുന്നത്. ഇന്റർസ്റ്റെല്ലാർ സ്പേസിൽ നൈട്രജൻ, ഹൈഡ്രജൻ മൂലകങ്ങളുടെ മിശ്രിതമായി ഇവ രൂപപ്പെട്ടതാണെന്നും കരുതുന്നുണ്ട്. ഉൽക്കാശിലകളിൽ അടങ്ങിയിരിക്കുന്ന ഓസ്ബോണൈറ്റ് എന്ന ധാതു ഇതിൽ അടങ്ങിയിട്ടുണ്ടെന്നും പഠനങ്ങൾ തെളിയിക്കുന്നു.
എനിഗ്മ ഭൂമിയിലെ തന്നെ ഏറ്റവും പ്രകൃതിദത്തമായ ഒരു പ്രതിഭാസമാണെന്നാണ് ലണ്ടൻ ആസ്ഥാനമായി പ്രവർത്തിക്കുന്ന, ആഭരണ വിദഗ്ധയായ നികിത ബിനാനി അഭിപ്രായപ്പെടുന്നത്. നൂറുകോടി വർഷങ്ങൾക്ക് മുമ്പ് രൂപപ്പെട്ട, അത്യപൂർവമായ, പ്രപഞ്ച വിസ്മയങ്ങളിൽ ഒന്നായ ഒരു വജ്രത്തെ സ്വന്തമാക്കാൻ ജീവിതത്തിൽ ഒരിക്കൽ മാത്രം വന്ന് ചേരുന്ന അവസരമാണ് ഇതിന്റെ വിൽപനയെന്നും അവർ പറഞ്ഞു.
ഇതിന് മുമ്പ് ഇത്തരത്തിലുള്ള ബ്ലാക്ക് ഡയമണ്ടുകൾ പരമാവധി 13,600 ഡോളറിനാണ് വിറ്റുപോയിട്ടുള്ളത്. അതിനേക്കാൾ പത്തിരട്ടിയിലധികം തുകയ്ക്കാണ് എനിഗ്മ ലേലത്തിന് വെക്കുക. ഫെബ്രുവരി മൂന്ന് മതൽ ഒമ്പത് വരെയുള്ള കാലയളവിലാണ് എനിഗ്മയുടെ ലേലം.
Comments